樂仔索女上身冧Kary

與吳雨霏（Kary）戀情曝光的余文樂近日認真風騷，為博女友一笑，竟率領籃球隊隊員學足NBA球隊邁阿密熱火，拍攝短片大玩街舞哈林搖擺（Harlem Shake）！再次以「王馨平2.0」造型上陣，阿樂目標可謂達到，即逗得Kary罕有的首次公開冧爆留言：「想笑死人咩！」認真情人眼裏出低B！

早前在電影中反串、扮多年前《別問我是誰》MV中的王馨平的余文樂可謂扮女人扮上癮，有見監製錢國偉早前扮韓國歌手Psy扮到街知巷聞，再加上女友Kary早前又親身上陣大跳騎馬舞，阿樂為博Kary一笑，即投其所好，日前率領橫洲工業籃球隊隊員，大跳熱爆全球的街舞「哈林搖擺」！

周柏豪潮版老夫子

其實NBA球隊邁阿密熱火早前也大跳哈林搖擺，該短片至今已有超過2,500萬的點擊率，阿樂和球隊有樣學樣之餘，更抄到十足十！

昨日阿樂在微博上載長達兩分鐘、名為《橫洲工業哈林shake》的短片，眾人以各種經典動畫或電影人物造型上身，包括龍珠、史迪仔、貞子及孖寶兄弟等，阿樂則食髓知味、繼續反串扮王馨平並施展蝴蝶手，而周柏豪則扮老夫子，大家不斷扭腰擰籮，非常搞笑，尾段周柏豪為加強氣氛，竟「壓軸」大跳Break Dance贈興，怎料跣腳仆倒當場！

短片單是在內地某個網站上載了6小時，已有超過21萬點擊率，認真厲害！Kary也一改早前低調作風，禁不住在Instagram留言給阿樂打氣說：「想笑死人咩！」昨日阿樂接受電話訪問表示，今次拍短片是即興：「前日我喺內地開工，隊員喺WhatsApp同微信話不如拍片，結果我一做完嘢就漏夜返香港。原本諗住搵電影公司借道具，不過因為係星期日，職員放假，所以都係由隊員去借，我都好開心大家咁熱心去拍呢條片！」

發表「封女」宣言

阿樂透露全片僅花一小時便完成，不過卻發表「封女」宣言：「我又唔使顧形象，大家開心吓我又唔介意！我都扮咗王馨平兩次啦！所以我要封女，唔再扮女人啦！」不過當問到女友Kary亦有留言讚好，他即詐傻扮懵說：「係咩？多謝喎！」

自言花了三小時剪片的周柏豪表示隊員的親友都在現場，問到Kary有否在場，他說：「冇呀！你講邊個呀？最感動係見到大家咁團結去做一件事，可能大家會覺得好無聊，但第時我老咗又可以同啲孫一齊睇番後生嘅自己，等大家可以笑吓！」