Kary冧笑忍唔住讚正 樂仔攰爆不否認同房

31歲的余文樂，與年輕5歲的吳雨霏撻着後赴英蜜遊，但經常被網友撞破。昨日二人返港時前後腳出閘，阿樂舉起勝利手勢任影，反觀Kary則急急腳走人。避認拍拖的二人不約而同冧笑高呼「玩到好攰」，盡興而歸！

甜蜜歐遊十日的余文樂與吳雨霏（Kary）終於返港，「樂霏戀」被踢爆後，兩人在英國的行蹤幾近被網友「全程直擊」，由香港上機、遊英，以至到瑞士返英國等都被拍照放上網！阿樂亦對Kary寵愛有加，豪花十多萬元包起對方的交通費，二人到英國希思路機場，乘CX254航班商務客位返港。

由於二人抵港時間早已「通天」，昨日機場有近半百記者守候。約傍晚六時四十分，阿樂與Kary前後腳步出閘口。率先步出的阿樂全程冧笑，並把手推的四大篋，包括兩個與Kary同款的情侶篋交給四名公司同事，「被圍」的他大方企定定「晒V」任影兼受訪。

（記：記者　樂：余文樂）

樂：（撒嬌並重複兩次）好攰呀！好想返屋企，都冇諗過做訪問！

記：玩到腳仔軟？

樂：（甜笑並「咔咔」兩聲）去旅行梗係周圍玩o架啦！

記：你同Kary發展得咁快，一齊去旅行，即係情侶？

樂：（詐傻扮懵）你講咩呀？

記：咁你依家同Kary係咩關係呀？

樂：我之前喺Instagram講過，工作以外嘅嘢我好少講，唔回應咁多，低調。尤其係感情事，唔想答太多。

記：如果話Kary係你女朋友介唔介意？

樂：（先啞口無言3秒，再狂笑）可唔可以放過我呀？

記：為咗保護感情唔講？

樂：唔係，我好攰呀！想返屋企，冇諗過答咁多嘢，何況唔係我一個人嘅事。

記：係咪Kary唔畀你講呀？

樂：畀啲時間我同尊重我啦！

記：Kary係咪你結婚對象？

樂：（答非所問）總言之我返嚟係繼續做嘢賺錢，要搵更多錢。

記：你豪使十幾萬包起Kary嘅行程喎！

樂：（狀甚雀躍）我不嬲都大方，我都有請過你哋（記者）食飯啦！

記：咁你同Kary係唔係同房呀？

樂：（伸手搭住記者膊頭）我好多間房o架！

記：有傳Kary溝唔到周柏豪先溝你喎！

樂：（好大反應）嘩！我正好多！

記：聽講你喺英國機場爆粗鬧記者喎！

樂：完全係一個誤會。

其後阿樂輕撥記者咪牌，登車離去。約十分鐘後，同樣有四大篋行李的Kary鬼祟地由另一閘口步出，其公司派出3名員工接機。她出閘後快步前行，一直低頭卻不時冧笑。其公司員工更出手推開記者，一度造成混亂，經記者多番要求下，Kary才稍停下兩秒拍照，並邊行邊答問題。

（記：記者　K：吳雨霏）

記：你依家同余文樂咩關係呀？

K：因為啱啱返嚟，唔知道大家（記者）接我機，所以好Surprise！

記：咁余文樂係唔係你男朋友？

K：呢啲遲啲再講！

記：你去旅行時係唔係同余文樂同房？

K：（即時瞪大對眼甜笑，示意記者）行啦！行啦！

記：係咪公司唔畀公開關係？

K：唔係！啱啱落機好攰，仲要趕住做嘢。

記：有傳你溝唔到周柏豪先溝余文樂喎！

K：（冷笑）呢啲係不實報道！

記：邊個正啲呀？

K：（口快快回答）兩個都正！

記：你話「兩個都正」？

K：（冧爆怕醜勁笑）唔知呀！唔知呀！唔知點答！

最後，Kary在同事陪同下登車離開。阿樂與Kary離開後即時在網上留言，阿樂在Instagram上載媽媽的照片，表示回港後第一件事是與媽媽吃飯，而Kary則在微博向記者表示：「剛剛（在機場）也有點混亂和碰撞，不好意思……希望大家能體諒。辛苦了！」