杜汶澤當眾除DaDa衫

杜汶澤吊高完周秀娜再吊高陳靜（DaDa），可謂「艷福無邊」！DaDa綵排時卻擔心會驚到哭成淚人，而自爆風流韻事的阿澤突然被女觀眾上台「攞米飯」，即場嚇到腳仔軟！

阿澤繼頭場Talk Show當眾吊起娜姐後，前晚舉行的第二場再請來DaDa客串被吊高，他更為「着地」的DaDa除下太空衣。能夠帶兩大女神「上太空」，阿澤得戚地說：「爆炸糖喎！點少得佢呀？娜姐同DaDa都係我想『吊』嘅對象，但尾場嘅嘉賓就真係抵『吊』！」據悉，他邀得「出爐影后」薛凱琪（Fiona）為其尾場站台，面對牙尖嘴利的Fiona，阿澤難免要打醒十二分精神應付。

而前晚發生小插曲，自爆風流史的阿澤笑言曾是夜總會常客：「做得呢行最怕畀人認出，試過有小姐話我好熟口面，指住我大叫『我知道你係唱歌嘅阿牛』，後來我更加有恃無恐，阿牛後尾連婚都離埋！」未幾他邀觀眾上台猜枚，想不到獲邀的女觀眾相當豪氣地說：「你都真係熟口面，係咪喺夜場大家見過？」嚇得阿澤不懂招架，經三思後才確定對方開玩笑。

江若琳睇到喊

至於他不時拿經理人公司老闆楊受成作模仿對象，前晚為座上客的楊太則大方表示阿澤舉止神似，而現身捧場的江若琳，被阿澤對田蕊妮的真情剖白感動到淚流滿面。原來今次Talk Show為阿澤帶來不少壓力，他更緊張到失去十磅肉，連預先度身訂造的禮服亦變得不合身：「啱啱又遇正過年，想搵人改都唔得，惟有臨急再去買過一套。」難怪問到會否再開Part 2時，他即耍手兼擰頭。