未忘舊愛 馬國明望住杏兒叫定欣

楊秀惠甩舊愛，而馬國明卻似對舊愛胡定欣念念不忘！這對舊情人昨日與胡杏兒及賈曉晨等宣傳新劇《戀愛季節》，馬明在台上竟叫錯劇中女友杏兒做「定欣」，直至杏兒開聲才驚醒！對於與朱晨麗、岑麗香及唐詩詠傳緋聞，馬明說：「都係雜誌送畀我，寫到我都以為有3個女仔等緊我！（揀邊個？）唔係我揀，係人哋唔揀我，突然多咗咁多桃花，搞到我阿媽都以為呢行好易識女仔。（伯母揀邊個？）佢冇講，佢冇傳媒咁關心我呢方面。」

至於杏兒則透露元宵要到北京宣傳新劇，問到會否順道與內地緋聞男友見面，她說：「邊有？唔好亂講我去會情郎。（影到你之前愁爆買醉？）我飲奶咋！不知幾開心！冇愛情都有其他嘢啫！（想拍拖？）急唔嚟，隨緣，有又得冇又得。」怎料好姊妹定欣踢爆她恨拍拖：「佢不嬲專注事業，依家想事業同愛情都有。（介紹筍盤？）佢咁好條件，自然吸引到優質男士，有啱嘅我都會推薦。」

而賈曉晨則笑言難忘對手梁烈唯的口水味：「開工第一日就係咁錫。（想同男友樊少皇試？）場戲又喊又錫，正常唔會咁。（之前一齊返鄉下，男友趁勢求婚？）冇，事業未上軌道唔會諗，啱Timing先做。（預支蜜月好開心？）唔識答，最緊要開心。」