祖兒冰雪女神高台獻Sing

樂壇天后容祖兒將偕天王黎明、內地歌手周筆暢、前體操世界冠軍劉璇和李小鵬等到澳門合演大型水上音樂騷「非凡之旅」，祖兒更希望如猴子般將飛天絕技加插在個唱中。

樂壇天后容祖兒（Joey）及天王黎明等歌手將破格與一眾金牌運動員，於三月二日假澳門新濠天地水舞間劇院合演水上音樂騷「非凡之旅」。

17米高都唔驚

小時候已跳跳紮的Joey坦言非常仰慕空中飛人的「飛天」絕技：「每次睇雜技表演，一到空中飛人我就醒晒，見佢哋飛嚟飛去好型！可能我屬猴，細細個都成日喺屋邨玩爬鐵架，就算跌到損手爛腳都繼續玩！」原來Joey曾想過在個唱化身空中飛人：「唔知香港有冇歌手試過，但我真係有諗過加呢個元素入演唱會度，相信會令個唱更加目不暇給！」今次她在劇中雖然不會「飛天」，但會化身「冰雪女神」，站在高17米的台上獻唱，Joey竟然未驚過：「我冇畏高㗎！不過第一次企喺咁高嘅台度唱歌，都有少少緊張嘅。希望有多啲時間綵排，等自己適應吓居高臨下唱歌嘅滋味！」

首次在澳門演出的周筆暢，雖未知會否與Joey合唱，但化身「金火女神」的她同樣會被吊上半空演出，她有點緊張地說：「導演都有問我介唔介意吊喺半空，我都OK嘅！」不過她未敢向更高難度挑戰：「如果要我玩體操同游水就唔得喇，運動員專業好多！」

劉璇舞「功」合一

至於高難度動作自然難不倒金牌體操運動員劉璇和李小鵬，所以導演要考考二人的演技，特意為他們安排了感情線。對此，李小鵬大賣關子：「導演是有提過，但我也不太清楚會怎樣穿插在故事情節中，暫時保留一下神秘感吧！」而劉璇則會挑戰自己，將體操、舞蹈和功夫三合為一，大顯身手，她坦言有壓力：「因為我唔熟水性，喺水舞間演出令我有啲緊張！」