甄妮未順氣再寸G.E.M.

一連三場的甄妮紅館演唱會前晚開鑼，大晒人字波兼美腿的甄妮又唱又跳，寶刀未老，「巨肺鼻祖」甄妮大爆當年黃霑稱她「巨胸」。此外，她又將與G.E.M.的是非擺上枱，句句有骨！

現年60歲的甄妮前晚舉行《愛SHOW世界巡迴演唱會「完美篇」》，獲無綫高層梁乃鵬、呂良偉及林建名等捧場，而女兒兼導演Melody則全晚留守控制台。唱功了得的甄妮全晚除了獻唱多首經典金曲外，更換上多套噴血性感裝，大騷驕人上圍，其中一套白色晚裝毫不吝嗇展現人字波及美腿，性感程度爆燈，絕不遜於新一代歌手！

「巨胸」變「巨肺」

全晚的焦點落於甄妮再隔空暗寸G.E.M.（鄧紫棋），肖蛇的她有骨地說：「今年係我嘅本命年，雖然我唔信但都有問過相士，佢話我年頭會多是非，大家都睇到o架啦！」另外，她又指為了化解血光之災，早前特意去剝牙，並呼籲粉絲派利是沖喜，在場識做的粉絲即蜂擁上前狂「塞」利是，她說：「收到梁乃鵬嘅利是一定要袋住呀！不過我會將啲利是捐出嚟做善事嘅。」

表演嘉賓張敬軒一上台即與甄妮打招呼，談到「巨肺」封號的由來，軒仔抵死地說：「係黃霑改嘅，指你上半身。」甄妮自豪地說：「本身話我巨胸，想文雅啲先叫巨肺咋！唔明肺點解會分大、中、細。」軒仔又識做地大讚甄妮皮膚白滑，她說：「你真係好有禮貌，我第二度仲滑！」笑言落台後給軒仔看，相當爆笑！

其後，甄妮繼續「發功」，批評時下的歌手：「唱歌唔係嗌就得，爆Key反而令人唔舒服，唔明點解咁都拎到冠軍。」她暗寸歌手開個唱要夠「料」：「開演唱會要有經典金曲，我就有百幾張唱片，如果唱人哋嘅歌就冇意思。」似是暗寸「小巨肺」林欣彤及G.E.M.。另外，她又大呻女兒的編排認真「攞命」，但會頂硬上支持！