黃秋生肉搏志偉「打跛手」

黃秋生與曾志偉於英皇新片《葉問－終極一戰》有場「世紀決戰」，演葉問的秋生與演白鶴派掌門人的志偉被安排對打，拍攝前為緩和氣氛，他倆竟將武打招式以慢動作預演，武術指導則花了2小時設計相關招式，二人反覆苦練3小時拳、腳、跳、轉才正式埋位，務求一Take過。

秋生與志偉，一個是大聖劈掛高手、一個是武師出身，雖「上了年紀」但仍身手靈活，絕對達到導演要求，雙方更互笠高帽，秋生說：「綵排戴咗手套，正式Roll機就赤手空拳，志偉都60歲啦，但好好打，拍完後雙手好多瘀傷，我諗佢返屋企都要搽跌打酒！」志偉「回敬」秋生說：「佢為咗部戲走去練詠春練咗差唔多一年，佢當正我木樁咁，打得非常有力，我梗係出全力還擊啦！佢啲拳風仲喺我耳邊擦過，能夠遇到真正高手係一件非常難得嘅事！」