羅力威萬萬聲氹父母

英皇歌手羅力威昨日在新碟簽名會上透露，封了5位數字大利是給父母，相當孝順！過年仍密密作歌的他，希望新碟成為大Project，像師姐容祖兒般做到一流！

羅力威（Adason）昨日舉行新碟簽名會，吸引約200名歌迷撐場，並獲贈對聯及生菜等禮物，寓意「和氣生財」！去年成績甚佳的他，農曆新年豪封大利是孝敬雙親：「夾埋封咗5位數畀父母，佢哋收咗就『哦』咁，多過往年，之前係4位數中間，今年就5位數頭。（新年點過？）冇特別，都係留喺屋企作歌！」問到有否去緋聞女友雨僑家中拜年，他說：「同自己屋企人過，留喺屋企。（林峯公開戀情，你拍拖會唔會公開？）我唔知佢公開，我就到時先算。」

以祖兒為目標

連過年亦勤力作歌的Adason，坦言已有不少作品：「啱啱交咗歌畀舒文（監製），畀邊個都好，依家已經隨時可以做第三張唱片，亦好多謝歌迷買碟，畀公司見到有希望。」他希望新碟能有一級水準：「見好多外國歌手嘅唱片包裝得好靚，希望之後可以做更偉大嘅Project，做好啲歌，投放多啲資源，好似祖兒咁，做到一流，做到最好！」他期望有朝一日能親自設計唱片封套，但不想有自己的樣貌：「冇樣更加靚，日、韓歌手Chok樣犀利，希望封套行畫畫路線，冇我個樣，大家都會買我嘅碟。」