估你唔到！瀧澤「變性」搵錢

尊尼男星瀧澤秀明近年轉戰舞台劇界搵真銀，下月滿31歲的他最近孖好拍檔今井翼變身美艷索女，反串代言女性化妝品，夠晒突破！

日本尊尼事務所曾捧紅近藤真彥、木村拓哉及瀧澤秀明等少女殺手，可惜近年力捧的新偶像未成氣候，在青黃不接下，目前事務所仍要靠一班「老臣子」孭起成頭家。

當年憑《魔女的條件》走紅日劇界的瀧澤秀明，下月踏入31歲，他趁這個男性黃金時期開始作更多方面嘗試，望告別偶像行列，轉型成為實力演技派。瀧仔近年單是演舞台劇及開騷已為事務所帶來可觀收入，最近他破天荒以「女性」姿態代言化妝品，與31歲同門男星今井翼以「瀧與翼」身份拍24h cosme系列廣告，兩人利用化妝及電腦技術，搖身變成美艷索女；今井的美人相貌勢令宅男望「真有其人」，瀧仔的金髮Look更叫人「認佢唔到」，有網友激讚其造型可媲美歐美名模，亦有指似俄羅斯網球女將舒拉寶娃（Maria Sharapova），而在同系列電視廣告中，半裸的瀧仔更分身上陣與自己演對手戲。

其實早於90年代，萬人迷木村已代言女性唇膏，同門組合嵐成員松本潤亦曾代言睫毛液，但反串拍廣告則屬難得一見。瀧與翼今次拍的化妝品平面廣告前晚在涉谷車站外首度曝光，引起極大回響，「美女照」更於網上瘋傳。

G-Dragon賣嬌俏

另一方面，韓國當紅男子組合Big Bang隊長G-Dragon，今年亦獲當地化妝品公司邀任代言人，廣告推出同樣「嬌俏」！