吳君如同志偉「濕吻」當送禮

藝人吳君如、伍允龍、陳嘉桓、王祖藍及王晶於觀塘宣傳新片《笑功震武林》，君如抱怨同片的曾志偉「假公濟私」：「套戲講志偉暗戀我，我哋有咀戲，佢當晒拍愛情片咁嚟咀，咀到我成面濕晒，仲猛咁NG，我懷疑佢有少少特登囉！我蝕晒底畀佢呀！不過算啦，佢今年60大壽，就當係我送畀佢嘅生日禮物！」她又表示入行以來最討厭拍咀戲：「唔理對手幾靚仔都係咁話，又唔熟，但唔知點解我成日中咀戲！我試過帶埋牙膏、牙刷同漱口水，喺對手面前刷牙，即係叫佢唔該都刷一次至好埋位。（從今宣布封嘴，唔接咀戲？）咁又唔得，我係演員嚟o架嘛！」

另外，伍允龍對於被指與鍾嘉欣相約到加拿大密會，他說：「應該問番個記者，佢點樣證明我嗰段時間唔喺香港呢？」