羅力威「宅」男守Dry缽

羅力威於情人節前夕舉行簽唱會，雖然一大班粉絲即場對偶像傳情，但他坦言情人節冇着落，會孤伶伶獨留家中，更避談緋聞女友雨僑。

英皇歌手羅力威（Adason）日前推出新專輯《LLV II》，昨日在商場舉行《羅力威　情人相聚簽唱會》，吸引近二百名粉絲撐場。Adason除了獻唱甜蜜情歌外，更與粉絲玩遊戲，獲勝的粉絲可親手餵他食窩夫，而另外兩組歌迷又即場製作了兩個心形咕o臣，向偶像表達愛意，Adason笑言要買新床褥配襯咕o臣！粉絲最後送上蛋糕，寓意新一年音樂事業繼續「彈高」，還有一份禮物是「情人串串心意卡」，由十張心形卡組成，代表Adason在粉絲眼中十全十美。

對於粉絲的熱情，Adason表示感激：「佢哋新年流流都走出嚟，真係好多謝，好開心啦！因為上年成績都幾好，而新碟銷量應該都唔錯，嚟緊都仲有兩場簽唱會。」問到有否帶緋聞女友雨僑回家拜年？他表示不回應，至於情人節怎樣過？他說：「都冇諗住點慶祝，都係喺屋企做嘢作歌，自己一個過。同埋都冇當今年有情人節，可能因為同新年疊埋一齊！」

失而復得好兆頭

他又自爆前日和家人郊遊：「我哋去咗個好偏僻嘅地方，爸爸早幾日喺嗰度行山跌咗我送畀佢部電話，我哋一齊去嗰度時搵番部電話，好有失而復得嘅感覺！平時都冇咩時間陪屋企人，係新年先有機會。」