鄭融學廚叻畀男友睇

「出得廳堂」的歌手鄭融，今個農曆新年許下「入得廚房」的願望：「我媽咪整嘢食好叻，新年會整好多賀年家鄉菜，佢係福建人，我最鍾意就係食佢整嘅福建煎堆，入面有花生、椰絲同糖，好甜！我都好想跟媽咪學整蘿蔔糕同年糕。」她更自爆學廚全為了英國籍的男友：「其實我男友煮西餐都好叻，我希望可以喺男友面前叻番次，親自整賀年食品畀佢食！」

她又讚男友入鄉隨俗：「佢同我拍拖之後就開始學廣東話，仲買咗本書自學。依家仲識講『恭喜發財』呢啲簡單嘅祝賀說話！」踏入蛇年，鄭融希望接受新挑戰：「除咗唱歌，我都好想可以好似王菀之咁拍電視劇。（最想拍咩類型？）最有興趣拍古裝劇，之前探田蕊妮古裝劇班，貪得意試戴個古裝頭套，覺得自己扮古裝個造型都幾靚，哈哈！」