徐子淇全家Hot爆過蛇年

踏入蛇年，千億新抱徐子淇跟各位讀者拜年，祝願大家新一年行大運，合家平安！子淇今年會偕老公李家誠及子女到外國旅行，並會親親海豚一起游泳，過一個熱辣辣又溫馨的新年！

在外國留學的徐子淇雖然不諳中文，但仍揮筆題字，寫上「蛇年大吉」及祝各位讀者新年快樂。她透露新春期間會舉家到外地旅行，過一個陽光與海灘的火辣新年，並會與海豚游泳，她興奮地說：「以前拍拖同老公兩個人都試過，但同埋仔女屋企人就第一次，老爺（李兆基）都會去，唔知佢到時會唔會同海豚一齊游水呢？」

子淇表示新年一定會依足習俗，為小朋友打扮一番，着到紅噹噹：「我鍾意幫囡囡打扮，過年會為佢哋着上小旗袍，紮個髻仔，好得意o架！但個仔就唔會着中國衫，因為好似好老土咁！」

全盒唔放糖

她又自爆兒時必會遵從家裏的過年習俗：「年廿八一家人要洗邋遢，年初一又唔准掃地，雖然『規矩』多多，但都會一一照做，聖誕節我哋都會跟外國傳統，咁中國新年就更加要，好似小朋友都識過年有利是逗，又識得去全盒攞糖食，不過為咗唔想佢哋食咁多糖，我會將全盒轉咗糖蓮藕、瓜子嗰啲，佢哋覺得唔吸引就會少食！」此外，子淇希望新一年大家健康快樂，不要再有天災人禍，平淡是福！