郭富城本命太歲婚婚鐘變

肖蛇的郭富城今年本命年犯太歲，將會按傳統攝太歲，事業為重的他，對於成家立室要容後再議，似乎緋聞女友熊黛林（Lynn）要做城嫂依然遙遙無期！

一般犯太歲的，流年運勢會有阻滯，故城城不敢怠慢，會按傳統攝太歲，他說：「某啲風水學說話我情緒會波動，反而有人話好，不過都會去太歲殿拜吓太歲，逢凶化吉！」身為廿四孝乖仔的他即使再忙碌，都會請假與家人過年：「呢十年都希望過年休息做個孝順仔，過年媽媽會準備齋菜、蘿蔔糕，自己都好等住去食！」

48歲都唔逼得

問到即將踏入48歲的城城會否有意欲成家立室？他即耍手擰頭說：「大家都認為以我嘅年齡應該結婚，但自己放唔低工作，有啲嘢我係唔可以逼，我唔係一個急於早結婚嘅人！」他如此大潑冷水，似乎緋聞女友Lynn未必能坐正，城城說：「感情嘅嘢話唔埋，始終一日未結婚都一日會改變。」

暫難愛得轟烈

城城一直將兒女私情收收埋埋，皆因想為自己留一點私人空間：「我覺得私人空間同工作要分開，我最唔鍾意係一段感情開始或結束，變咗一個笑柄或者茶餘飯後嘅一個焦點。」他揚言新一年會繼續少談感情，在演藝事業上繼續搏殺：「要我放低工作去享受一段轟轟烈烈嘅愛情我做唔到，我覺得自己嘅電影事業先啱啱真正開始，上年有新突破，仲破咗自己票房紀錄！」

愈Do愈旺 冇得蛇王

郭富城今年犯本命太歲，運程理應相對減弱，不過堪輿學家李居明卻預測他的事業會如日方中：「因為城城今年值太歲，而佢46歲後行金水運，所以運程相對較好，亦有好多朋輩同貴人相助，下半年北上發展會更有利！值太歲代表變動，好彩城城嘅變動大多都係好，事業會更上一層樓！」問到愛情方面的運勢？李居明坦言城城與伴侶感情保持穩定：「城城呢兩年行妻星同紅鸞星，所以佢有可能已經結婚，只係冇向外公開。」