阿倫影射搞電視台冇影

譚詠麟（阿倫）、葉玉卿賀歲電影寸爆無綫的對手、香港電視主腦王維基，大玩名字諧音直指「王危機」搞電視台不成，負債走佬累街坊。導演鍾澍佳笑說：「開玩笑啫！」王維基則一於少理，回應指未必有時間睇！

邵氏賀歲電影《2013我愛HK恭囍發財》前晚首映，監製曾志偉聯同參演的譚詠麟（阿倫）、葉玉卿、黃宗澤等出席，無綫高層樂易玲、邵氏高層黃家禧等亦有捧場，場面墟冚。電影一開場即惹全場爆笑，原來劇情寸盡香港電視的王維基！

劇情講述阿倫為老友「王危機」做擔保借來700萬元搞電視台，結果「危機」搞唔成兼走佬，連累阿倫孭數陷財困幾乎想跳樓輕生，直指「危機」累街坊！當中呼之欲出的影射，令前晚差不多全院都是「無綫人」的觀眾，睇得拍案叫絕，反應大之餘，掌聲、爆笑聲不絕！首映後，志偉與卿卿等偕馮淬帆、古明華及魯芬等到派對慶功。

導演否認針對

對於寸爆對手王維基，又影射有人搞電視台搞到「冇晒影」，《我》片導演鍾澍佳接受電話訪問時說：「開玩笑啫！條橋係一班人撞出嚟，冇刻意針對王生嘅！」又指無綫沒有施壓要求加插劇情：「無綫冇干涉我哋度咩橋，我又唔係做電視！」問到會否擔心辣慶王維基，鍾說：「我唔識王生，相信佢冇咁小器，要嬲都嬲港府先啦，咁耐都冇發牌！」

而遭「借橋」吸票房的王維基，可能仍未知劇情內容，一於懶理。昨日記者致電聯絡他，其香港電視發言人代表回覆，指王維基未有時間欣賞《我》片，暫時未有回應，而新春期間亦未知工作時間安排，故揚言未必有時間欣賞。

「虛構」字眼唔等於免責

《我》片情節涉及影射成分，律師黃國桐說︰「含沙射影唔係問題，係睇吓唱衰之後當事人有咩損失，如果故事只係講走佬而未有為佢帶來極之負面影響，未必構成刑事惡意誹謗，要睇晒成套電影先可以斟酌。」至於電影出現「本故事純屬虛構」等字眼會否避過法律責任？他說︰「呢啲唔係免責條款，冇幫助。」