貝安琪食物中毒入院

首次在港拍電視劇的貝安琪（Ankie），因不懂看中文劇本而被考起，幸有媽咪劉香萍幫忙：「背台詞真係好難，全靠媽咪幫我錄起啲對白，我一得閒就聽，真係讀書都冇咁勤力，所以依家中文進步咗好多，連『牛唔飲水，唔撳得牛頭低』等都知道點解。」

劇中飾演女強人CEO的Ankie笑言變得愈來愈硬淨：「早幾日我食物中毒，發冷同係咁嘔，媽咪即刻送我入醫院睇醫生。去到醫院已經行唔到，要坐輪椅。醫生幫我打咗兩支針，休息幾個鐘先至好番，但唔想影響拍攝進度，第二日都照常開工，雖然唔係咁舒服但都頂住上。」