張暖雅幫Avis遭封殺

陳偉成（Avis）與周秀娜分手後被指有「小三」Vivian，o靚模張暖雅護Avis心切指有人博上位，辣慶Vivian密友、王晶女兒王子涵，除了留言揶揄對方，更下封殺令！

娜姐與Avis分手後，隨即爆出男方與o靚模Vivian的「床照」，張暖雅護友心切，日前出席首映時揚言覺得有人利用Avis博上位，故戥他可憐。身為Vivian好友的王子涵（Ada）對此怒不可遏，並在微博留言：「張小姐，唔關你事就收聲啦……你同你朋友盜用我個名出入早前嘅電影Private After Party博上位，我都未出聲！」王晶見到女兒留言亦回應：「呢條女周身水，任抽！」事後，王晶聲稱不知發生何事，只是「求其」寫。

反嘲「做咁耐冇人識」

記者事後向張暖雅求證，她得悉後即句句有骨寸爆Ada：「我唔識邊個Ada，依家知啦！原來有其父必有其女，王晶都經常鬧人！Ada話我博上位，咁佢都畀心機增加自己嘅知名度先，做咗咁耐都冇乜人識。佢幫朋友出頭無可厚非，但香港有言論自由，我都有權講嘢！（佢話你用佢個名去電影After Party？）我有首映飛，跟住咪去Party囉！嗰晚我都冇受訪，點博上位呀？」

Ada同樣勞氣非常，回應時即下「封殺令」，她說：「佢咪使旨意喺我公關公司同爸爸間公司搵到嘢做！我從來冇開名，如果佢冇做過，做乜對號入座？」她表示聞得張暖雅與友人以「王子涵朋友」身份進入Party：「我係冇知名度呀！我只不過係PR同學生，點解要紅呀？如果好似佢咁紅又成日畀人笑，死得啦！（佢話你幫Vivian？）我只係睇唔過眼啫！佢話人博上位，佢咪又一樣！」