朱茵湊女出關搞百日宴

去年由懷孕到誕下女兒叉燒包、接近九個月從未公開露面的朱茵，昨日被本報獨家拍得與老公黃貫中（Paul）外出為愛女搞百日宴，愛妻女心切的Paul更用盡方法保密行蹤，要求出席百日宴的密友發誓封口！據知，復出在即的朱茵估計穩袋800萬！

去年10月，為Paul誕下愛女「叉燒包」的朱茵一直專心湊女，連月來不少傳媒在其九龍城寓所守候，但最終仍未能拍得其蹤影。有傳朱茵早已搬到秘密居所照顧女兒，原來她仍住在九龍城寓所，昨日終被本報拍得「真身」。據知，Paul愛妻女心切，不想受傳媒騷擾，但昨日仍冒險帶妻女出巡，原來是在洲際酒店為愛女筵開4、5席百日宴，花費逾6位數字！百日宴只邀請雙親及身邊最親密的朋友，更要出席者發誓保密行蹤，不能洩漏半點風聲。

昨午約二時，Paul的七人車離開九龍城寓所，出發前司機把BB車搬上車，其後接女友人往中港碼頭買船飛，再折返九龍城寓所。下午五時許，朱茵帶着愛女與Paul乘車離開，期間不時兜路查看有否被追蹤，惟駛至土瓜灣時發現記者，Paul即落車走到車行找朋友求救，朱茵則留在車上；未幾，一輛私家車駛出欲阻擋採訪車，其後Paul走到採訪車前問︰「做乜？」及後，記者走近七人車前拍照，見留在車上的朱茵產後已成功收身，司機見狀甚為緊張，即拉上窗簾及阻擋記者鏡頭。直至晚上8時許，好友陳法蓉現身，問到送甚麼給BB？她笑而不答便步入酒店。

廣告商掟數百萬誘一家代言

事後，Paul接受電話訪問時對行蹤依然保密，亦否認昨日是為愛女搞百日宴︰「唔係！只係約朋友食飯。（點解咁緊張？）因為朱茵同BB喺車，不嬲都好保護佢哋。其實朱茵之前都出過兩、三次街，但今次係第一次畀記者影到。」另外，Paul近日繼續搵奶粉錢，亮相內地音樂對決節目，用搖滾方式改編張學友的《吻別》，但最後出局。

據知，朱茵懷孕時已有BB產品、商演、廣告商及電影向她招手，保守估計有800萬酬勞，更有廣告商以數百萬銀彈利誘三口子做代言，惟兩人不為所動，但朱茵近月已積極收身，月內首次亮相活動。