基仔「出關」內地掃4獎

林峯前晚在廣西南寧舉行的《音樂先鋒2012年度頒獎典禮》獲頒「全能藝人」，但他因為準備紅館騷而未有現身，反而早前缺席本港四台頒獎禮的古巨基，當晚則「出關」亮相！

基仔與容祖兒同奪4個大獎，聯同英皇歌手Twins、洪卓立、鍾舒漫、林欣彤及羅力威等共奪21獎，英皇成為大贏家。基仔在台上公開多謝幾位舊愛，因為他的得獎大碟是講述戀情：「我諗住將啲獎畀佢哋，覺得屬於佢哋，冇呢幾段情都唔會有呢隻碟！」放了大半個月假的他透露日前已復工，他笑說：「放假啲日子有番生活，我睇咗好多戲，又去咗韓國、台灣玩！（同邊個去先？）又嚟！（得力助手？）又嚟喇！」始終避而不答！