關心妍捧蛋慶過辣雞 

本為大熱歌手的關心妍在前晚的頒獎禮上坐足全晚冷板櫈,慶爆的她憤然宣布不再出席頒獎禮,是繼譚詠麟及黎明後,第三位「拒攞獎」的歌手,食白果的她大呻「好多人戥我唔抵」!

早前網上流傳關心妍(Jade)會在《十大中文金曲頒獎禮》連奪三獎,並會奪得「最優秀流行女歌手大獎」,故坐定粒六的Jade前晚以紅白露腿「戰衣」出席頒獎禮,卻被迫接受殘酷的現實:坐足成晚食白果,受到如此「屈辱」的Jade忍不住大發雌威,頒獎禮仍未結束便急急在微博發表「不再堅持論」:「再努力最終都失望......我也不能再堅持了,只希望今後好好過我楊太的生活!」

老爺壽宴都唔去

Jade昨日透過電話訪問正式宣布不再攞獎,但強調非退出樂壇,她心灰意冷地說:「我好攰!決定明年開始唔再出席任何頒獎禮,但仲未同唱片公司講。(因為尋晚頒獎禮冇獎?)本身都諗住做埋今年唔做,想好頭好尾出席埋今年,有個完美結局。其實對上一次拎『優秀流行女歌手大獎』係2003年,等到今年都係希望變失望!」

火燒心的Jade愈講愈慶,強調並非「輸打贏要」:「我做咗11年,係咪呻一句半句都唔得?自問今年開過演唱會、《失戀哲理》又拎金唱片,仲做埋傑出青年,好多傳媒都預測我有機會拎獎,但結果呢?好多人都戥我唔抵!其實尋晚我連老爺壽宴都冇去,寧願扮到好靚咁出席頒獎禮,點知半個獎半點鼓勵都冇!」最後她更「柴九」上身:「做歌手有幾多個十一年,為咗唱歌我仔都唔生住,我唔可以再等,要過番自己嘅生活!」而其唱片公司老闆娘諸葛紫岐昨日得知事件後,透過電話表示會尊重其決定:「佢有咁嘅意向我會尊重同撐佢。(覺得對佢唔公平?)總之佢係我好喜歡嘅歌手啦!」

被寸「冇半個獎」

此外,身為Jade好友的謝安琪(Kay),對於Jade宣布不再參加頒獎禮表示尊重:「其實唱歌唔係為攞獎,唔好咁睇重獎項,用心去唱,一定會有知音人。」問到可會覺得Jade不再攞獎可惜?她則不作回應。至於《十大中文金曲頒獎禮》大會總監馮偉棠昨日接受電話訪問,提到Jade宣布明年缺席所有頒獎禮時,他寸爆地說:「哈哈哈!我冇辦法。(關心妍話半個獎都冇?)點頒半個獎畀佢?我承認佢今年好努力,但付出同成果唔一定成正比。如果佢下年改變初衷,我哋大門會為佢而開,希望佢學識放下。」

音樂組

與薛凱琪同坐的關心妍(前),在台下強顏歡笑,焗住拍足成晚手掌!

Kay尊重老友Jade「拒攞獎」,但鼓勵對方堅持音樂夢。