高海寧生日冇仔陪

高海寧（高Ling）最近在無綫劇《法網狙擊》被白健恩強姦，露出白滑玉背而掀起熱話，人氣急升。大前日26歲生日的高Ling竟然冇仔陪，她當晚找來家人陪食飯慶祝。約傍晚6時半，戴上眼鏡、素顏的高Ling駕車與外婆及兩個弟弟往尖沙咀一個大型商場，他們先到時裝店睇衫，高Ling出錢買了不少禦寒衣物給大家。她沿途翹着婆婆，或搭她膊頭，非常體貼！即使被途人指着說：「嘩！高Ling呀！」她都未有理會，之後齊到附近一間泰國菜館開餐，高Ling載眾人返歸。

另外，高Ling昨日於電視城開工，她表示生日會跟朋友食飯，問到有冇男仔約？她說：「冇呀！清一色女仔。（點解？）咁忙，費事累到人，我仲咁後生，唔心急拍拖。蘇民峰話我行緊大運，今年係高峰，都係疊埋心水做嘢先。」對於《法》劇收視一般，她沒有不開心，粉絲留言讚她演技進步才最重要。