余少寶人財兩失萌死念

余少寶是1993年港姐季軍，跟同屆的莫可欣和郭可盈都被外界認定是婚姻美滿的少奶奶，其老公關兆輝是香港車神關兆昌的胞兄，從事汽車防盜及音響生意，亦是多匹現己退役名駒的主人，父親關志成和大伯關志堅更於1967年購入鑽石山片場，關兆輝名副其實含着金鎖匙出世。可是幸福的背後，原來少寶與關兆輝的婚姻早現裂痕，她接受本報訪問時，承認已經分居。

家人支持決定離婚

少寶日前出席活動時被發現向秦沛哭訴，當時秦沛說她仍為兩個月前上水寓所遭爆竊，被盜逾520萬元財物而傷心，原來她的眼淚不只為財物而流，而是感懷身世，短短一年接連遇上慘事，包括與丈夫分居及買樓遇上騙局，實在禍不單行。她表示結婚兩年後開始覺得性格不合，為不讓家人擔心，只好一直啞忍：「結婚頭兩年就開始覺得溝通有問題，感覺愈嚟愈淡，大家都冇乜溝通，真係好辛苦！」

她因得到家人支持，才作出分開的決定：「家人知道我哋嘅事後，好大力推動我（指分開），覺得我唔做少奶奶都可以好開心，我都掙扎咗好耐，舊年發生咗好多嘢，加埋加埋都唔順利，我失眠過好多晚，亦諗過自殺，但咁做就好自私，因為屋企人都好錫我，更加要企起身！」據知，少寶遇上「世紀騙局」時已醞釀分居，如今已搬出上水邁爾豪園獨立屋，與家人同住：「我同佢分開唔係為錢，同時亦唔存在第三者，但真係冇解決嘅方法，所以立定決心分開！」問關兆輝有否挽留？她斬釘截鐵地說：「有試過，但我唔想返轉頭，行呢一步的確唔易，前路可能一片漆黑或光明，我依家係乜都冇，但我唔後悔，因為要向前睇！」她更借爆竊一事自嘲：「唉！依家結婚證書同戒指都冇晒，可能個天話我知要從頭開始！」

歐洲散心兩個月

少寶為展開人生新一頁，已積極安排日後生活，她說：「已經開始鋪排，我喺外國讀書十年，應該會選擇喺外國搵工，香港太大壓力！」又說：「之前可能有好多人羨慕我，但依家要自力更生，我好知足，唔係為錢，清茶淡飯已經OK，最緊要健康！我知自己有屋企人錫，唔想令自己抑鬱，人會有喜有悲，最緊要係識企起身！」少寶表示辦離婚一事連朋友都蒙在鼓裏，只有家人知道原委，更着她到歐洲旅行散心：「去咗兩個幾月，以為可以放低，但係返到嚟，一提呢件事就忍唔住喊，傷口係需要時間愈合！」