祖兒師兄咀嘴係屋企嘢

天后容祖兒第八次奪叱咤女歌手金獎後心情超靚，台前破禁晒「龍」情，慶功宴再添蜜意，大方與男友劉浩龍（師兄）上演世紀合照，哄動全場！

祖兒與師兄拍拖大半年，前晚二人於叱咤頒獎禮傾偈握手晒甜蜜後，大熱奪女歌手金獎的祖兒，自然替首奪叱咤歌曲獎的師兄高興，兩人不避嫌雙雙出席慶功宴。

當祖兒和師兄在台邊等候上台祝酒時，祖兒見閃光燈不斷即醒目地問記者：「你哋要借位影呀？」記者遂要求她與師兄合照，祖兒相當大方，更主動走到師兄身邊，兩口子「世紀合照」時，師兄身體「挨近」女友，全場記者頓時蜂擁「搶拍」，令正在台上的方大同及盧凱彤被冷落呆企，大會司儀索性邀「龍兒」上台再影過，但未成事已被祖兒的助手快速「搶位」，拉着羅力威與馮允謙與祖兒影相，「拆散鴛鴦」隔開祖兒與師兄。

男友得認同等都值得

問祖兒可戥師兄攞獎高興？她難掩開心地說：「戥！（吻賀咗未？）上次還上次，今次還今次。（師兄等咗八年再攞獎意義好大？）有啲歌手好運，好快得到認同，但有啲就要等，但等都值得嘅。（主動握手？）握手有乜問題？要恭喜就要做啦！」另外，提到鄧紫棋（G.E.M.）拍短片暗寸叱咤的風波？祖兒替G.E.M.說好話：「希望大家打開心扉接受唔同聲音，唔覺G.E.M.有問題，希望佢繼續努力，欣賞佢才華，佢思路好清晰，世界冇懷才不遇，肯努力有實力能戰勝一切。」對於何韻詩亦批評G.E.M.，祖兒則說：「唔係鬧，係分享意見啫！」

至於相隔八年再踏叱咤頒獎台的師兄，被問是否想由祖兒頒獎？他即扯開話題：「兄弟頒畀我都好開心。」被笑問是否要女友吻賀？師兄笑逐顏開地說：「屋企嘢，公眾場合唔講。（台上唔多謝女友？）我有多謝我啲好朋友。（祖兒旺你？）佢叫阿祖，唔係阿旺。」