子珊面青青倒數

近日本港氣溫驟降，不少藝人也難抵嚴寒而病倒。不過臨近年尾，徐子珊、胡杏兒及古天樂即使抱恙仍然要出席活動，一於搵錢至上！子珊更暈船浪，認真水皮!

大除夕當晚本港氣溫降至10度以下，一眾藝人無懼寒風，與市民齊齊迎接2013年的來臨！不過當中亦有藝人打敗仗，抱病上陣出席倒數活動。正忙於拍攝新劇《神槍狙擊2013》的徐子珊，前晚便抽空與老拍檔謝天華過大海到澳門倒數，吸引數千人圍觀。而一班來自內地、香港、馬來西亞及澳洲的影迷，亦專程到澳門與子珊齊齊迎接新一年，場面熱鬧！

子珊為求以最佳狀態演出，在未有進食的情況下便登船，但當地氣溫比香港還低，雖然她打扮密實，但仍病倒。她頂硬上與影迷握手及合照，但回程甫抵港便忍不住嘔吐，她說：「其實去嗰程已經想嘔，標晒冷汗，不過頂到半夜返到香港，隻船泊岸後，面都青晒，最後攞咗嘔吐袋走入VIP房度嘔。我仲同天華講笑，話對得佢太多所以嘔！由之前賀歲片到《神》劇，就連今次個騷都一齊，仲唔對到嘔咩!」談到新年願望，正抱恙的她指健康最重要，但補充說：「都想有更多人錫我，同埋工作上有更多進步！」

杏兒戒男仔頭

另一方面，杏兒前晚現身倒數活動。她透露日前於內地拍劇病倒，其後到寒冷的北京宣傳，凍至聲音沙啞。她的新一年願望是「身體健康」，又說：「希望可以女仔啲，要留長頭髮，樂小姐都話我太男仔頭（期望新戀情？）隨緣，變番女仔啲先（有冇追求者？）感覺唔到（心儀對象？）太忙未諗（想異地戀？）隨緣，盡量唔好分得太遠。」她表示將拍新劇《巾幗梟雄3》。提到《衝上雲霄Ⅱ》與該劇都是大劇，會否擔心來年的頒獎禮會自己打自己？她說：「唔會啩！《衝》劇都唔多戲份，《巾》劇就難度大，好期待同三屆視帝黎耀祥合作。」而古天樂亦於微博表示近日因太忙碌而發高燒。