柏豪驚(火羅)冇膽錫JM

歌手周柏豪前晚舉行尾場個唱，好友余文樂及文詠珊（JM）擔任神秘嘉賓，觀眾嗌柏豪咀JM。他笑言擔心JM避開爆，故沒有應要求索吻。

周柏豪一連三場《PAKHO IMPERFECT LIVE 2012》演唱會前晚圓滿結束，師妹官恩娜及連詩雅（Shiga）擔任嘉賓，Shiga雖抱病上陣，但亦沒甚影響，更以透視裙露腿。當柏豪獻唱好友余文樂的《生還者》時，阿樂突然現身與柏豪合唱，令他驚喜萬分，並埋怨工作人員：「離譜！騙子！我話過唔畀你哋呃，又畀你哋呃到！」阿樂笑說：「本來要拍戲，點知唔使拍，朋友嚟睇咪一齊，我知你唱我首歌咪一齊唱，反正我好耐冇唱。」阿樂謂柏豪不應只唱細場：「紅館啦，我幫你同公司講，三場唔困難啫，公司話OK o架喇！」但不忿被蒙在鼓裏的柏豪續說：「騙子，欺騙我感情！」

另一好友文詠珊（JM）則現身獻花，有觀眾大叫「咀佢」，柏豪反問：「你估結婚咩！」最後兩人擁抱。柏豪受訪時表示，沒有想過阿樂與JM會出現：「真係估唔到，電話簿嘅朋友出晒嚟！好嘢！呃到我！（唔錫JM驚被拒絕？）梗係，佢避好。（因為女朋友喺台下？）唔關事！」問到可會因已去世的婆婆未能欣賞而感美中不足？他說：「唔可以咁講，生命嘅一部分，要接受。」

「最緊要一支嘢」

而再擔任嘉賓的張敬軒笑問為何冇份摸柏豪的腹肌？柏豪即說：「有嘅！」但軒仔竟打退堂鼓：「唔好喇，一陣見報變咗我同性密友！」隨後軒仔講有味笑話：「男歌手最緊要一支嘢，最緊要有支勁嘅咪，張學友都係用呢個牌子，拎呢個咪嘅都成為一線男歌手！」他說罷在袋中拿出一支黑色咪，並說：「戴番個套先！」柏豪附和說：「啱嘅，安全啲，費事花，成日擺出擺入！不過我唔識戴！」令全場爆笑。