峯珊「水」起熱爆2013

林峯與徐子珊雖然失落視帝視后，但2012年仍是豐盛一年。由於除夕夜要分道揚鑣搵銀，二人率先舉行除夕派對，為2012畫上完美句號！阿峯與子珊以咖喱對抗寒流，過一個熱辣辣除夕迎接2013！

未能在無綫頒獎禮成為帝后的林峯與徐子珊，事業仍然相當旺盛，商演活動長接長有，荷包「水」浸，已是業主的二人曾揚言欲再下一城置業，照目前情況來看，目標又邁進一大步。除夕夜向來是藝人搵錢黃金檔，阿峯與子珊兩位大紅人當然有工作在身，未能盡情享受假期，二人分別到廣州及澳門出席倒數活動，不過仍無損他們雅興，日前相約提早慶祝，更以咖喱及叻沙等熱辣辣菜式取代傳統西餐。

為個唱地獄式訓練

兩個大細路甫見面即玩到癲，眼見子珊玩鬥雞眼，貪玩的阿峯有樣學樣，阿峯更整蠱子珊，以對方瘦削為由，不斷餵她進食，令子珊不懂招架，惟有密密食，後來見阿峯笑到肚攣，她才獲悉被玩，即不斷夾餸給阿峯還擊，惹笑非常！

在內地完成劇集拍攝的阿峯，返港後便要綵排演唱會，未能享受假期：「月底係演唱會，再唔排就冇時間，時間緊迫，要地獄式訓練。之前演唱會玩過水同火，今次會有新嘢畀大家，保證大家唔會悶，但係咩就要賣個關子先!」

而子珊完成賀歲片拍攝後，小休數天便要為新劇《神槍狙擊2013》開工。已是第7次演警察的子珊笑言已演得相當熟練：「唔知點解咁鍾意搵我做呢啲角色，為免觀眾睇到厭，我會盡量搵啲新元素畀大家嘅！（除夕點慶祝？）冇啦！其實都慣咗假期工作，正日冇得玩，之後再約朋友慶祝囉！到時仲冇咁多人添！」