亞視3招強制藝員上堂

亞視自爆出全城插爆的「強制藝員上課、違者即炒」後，昨日再加推「3辣招」：要藝員簽到、上堂交出手機及安排保安監場。有藝員覷準亞視要害，反建議亞視津貼車馬費及上堂計騷錢，但已遭否決！

昨日平安夜，亞視依然要藝員朝10晚3返大埔總台接受「演藝訓練課程」，但「王」恩浩蕩由一周返足5日改為只返一、三、五，下午的上堂時間更改遲半小時，讓藝人有個半小時午膳。林紫君、張家瑩、亢帥克、李建龍、蔡國威及筱靖等，昨晨十時前乖乖返到，但不少女藝員因趕頭趕命而素顏，其中姚嘉雯疑因「五官唔齊」而以手遮面，「飛的」的馮家俊更遲到10分鐘。亞視除安排保安阻止記者入內採訪外，還加推「3辣招」：一、要求藝員進入大樓前在感應器上拍卡簽到；二、藝員上堂要交出手機，但因遭反對而改為將手機放枱面，由兩名保安監視；三、上課期間不准拍片或錄音，若有內容外洩即向全體上堂藝員追究，期間安排兩部攝影機拍攝上堂情況。

王征突擊監督

中午12時「放飯」，姚嘉雯乘的士外出時說：「上晝鄺凱迎（亞視高級副總裁）教營運同亞視點樣走過來。（要交出手機？）放晒喺枱面。（王征突擊督學？）冇錯。上堂有人反映，好少藝員咁早返工，尤其夜晚開工嗰啲好辛苦，又有人提車馬費、計騷錢。其實我仲有5個月約，未傾續約，會同葉家寶傾，想開心舒服啲。」

不過，亞視高層葉家寶談及車馬費及騷錢即說：「公司只會考慮畀前一晚開夜嘅藝人返晏啲，其他嘢唔會考慮！上堂係藝人得益，加強質素應付明年亞視同外面嘅大量工作。打卡唔係唔信藝人，係想公平處理，有證有據，紀律好重要，必須執行！交出電話係想藝員專心上堂，尊重導師。（搵保安監視係怕聲帶流出？）公司唔想再有內部培訓內容外洩、被斷章取義。今日起嚴禁拍片錄音，由保安監察。（亞視聲明歡迎旁聽？）課程會選擇性公開，今日講內部家事，未方便旁聽，遲吓高志森、黃桂林做導師，可以考慮。」對於甄詠珊及蒲進昨日缺席，他表示要了解。此外，兒童節目主持伍偉樂，據知原是第5名在冬至曠課被炒的藝人，但他及時收風，跛住腳返亞視請假，更Call白車送院才逃過一劫。

亢帥克照偷拍

亞視雖推辣招，但「亞視之子」亢帥克卻「斗膽」將上堂照上載至微博，他在電話中說：「唔係博炒，如果覺得我洩露機密，應該有人搵我。（有攝影機影住？）係，有少少緊張，打喊露都匿埋，唔敢撩鼻屎。」同是「星光幫」的于天龍則在微博留言：「我在今個月初完約亞視，好感恩！」似慶祝甩難，順道替被炒的女友陳綺雯出口氣！此外，亞姐馮雪冰及王家敏不用上堂，以致有藝員抱怨大細超，據知二人的合約沒有上課條款，亞視曾叫她們加簽但遭拒絕，故未能將她們「落鑊」！