AOA孖妹血淚芭蕾

樂壇孖女組合AOA自小開始學習芭蕾舞，一字馬等動作對她們來說易如反掌，但背後付出了很多時間及心血，苦苦耕耘才有此成績！她們坦言練舞時有很多痛苦經歷，又試過跳到流血，但一切都值得！

姊姊Annelle（大Ann）與細妹Annice（細Ann）由4歲開始學習芭蕾舞，父母當年看見她們聽到音樂即手舞足蹈，便帶她們報讀芭蕾舞課程，但要被選中為學員已困難重重，只有4歲人仔便要做出一字馬及拱橋等高難度動作，她們憶述：「嗰段時間好深刻，媽咪每日都幫我哋壓一字馬，我哋會計吓仲有幾多個拳頭先可以貼住地面！」雖然過程艱辛，但二人認為得着更多：「因為有好多演出機會，令自己更大膽，唔會怯場，結果一學就14年！」

內訌爭做主角

芭蕾舞不乏跳躍及轉圈等高難度動作，講求技巧之餘又着重美感，問到有否因而受傷，細Ann說：「有時對鞋太硬，會跳到起水泡同流血！」大Ann的傷勢則較嚴重：「最嚴重一次喺北京演出，倒後跳嘅時候撞到音箱，搞到骨裂，有段時間跳唔到舞！」成功背後總要付出代價，跳芭蕾舞主要靠腳腕，而練習單腳轉等動作則要雙腳用力，故小腿肌肉較發達：「練舞好花時間，有好多嘢要取捨，不過就算小腿粗啲都唔緊要，因為值得！」

孖女讀書時同屬舞蹈隊，細Ann指家姐多擔任領舞角色：「佢成日都係主角，有時我都會羨慕！」原來二人曾多次爭做女主角，大Ann說：「其中一次細Ann贏咗，老師話佢笑容甜美啲，我唔開心咗好耐！」

入門小知識

在缺乏運動的都市人眼中，一字馬及拱橋等動作可謂遙不可及，但對芭蕾舞者來說只是基本的熱身動作。由於芭蕾舞講求身體柔軟度，故此類高難度動作只屬入門級！

手位7式：學芭蕾舞第一步是學習手位，手位共有7個步驟，每步的雙手位置均有所不同。

腳尖：學習手位後，要鍛煉的便是腳尖，由於芭蕾舞有很多動作都以腳尖支撐身體，故初學者會先靠牆或扶着欄杆練習以腳尖站立，再練習單腳支撐身體的動作。而進階版就是不靠任何東西借力，單靠腳尖力量支撐身體，繼而做出Attitude Croise Derriere等動作。

技巧：學好基本功後，便開始學習舞蹈技巧，包括跳躍及轉圈等動作，如單腳轉（Pirouette）。在舞劇中，大家不時見到男舞蹈員抱起女舞蹈員，雖然AOA是兩位柔弱的女生，但細Ann亦可即場抱起大Ann做出跳躍動作，相當厲害！

貼心舞鞋講Feel

一對合適的舞鞋對舞者十分重要，大Ann說：「每對新鞋都要花幾個月着軟佢，同埋培養嗰種感覺，所以舊嘅舞鞋更好！而且鞋入面要有一個軟墊，用嚟保護腳趾，如果唔係好易受傷！」細Ann續說：「鞋面係絲綢之類，我哋會喺鞋頭黐膠紙，有防跣作用。」二人會在新鞋的鞋踭位置釘上一條橡筋帶，並按腳形屈曲，令舞鞋變軟。