陳煒歐錦棠圍剿亞視

亞視被指強迫藝人「返學」讀歷史，五名「逃學威龍」慘遭解僱，令一眾前亞視藝員喪插舊公司，歐錦棠更怒斥「只有更衰」！曾為亞視救亡的監製鄧特希亦寸爆叫盛品儒及王征去上堂，笑言亞視定位是「全力得罪香港觀眾」。

前亞視藝員陳煒及歐錦棠昨日擔任無綫節目《體通體透》嘉賓，提到舊公司亞視被爆有藝人因「逃學」而被炒一事，歐錦棠即暗以粗口喪插：「之前聽到話要藝人上堂已經覺得無厘頭乜嘢，新人就話啫，有十幾年演藝經驗仲上咩堂呀？唔出席唔使畀信啩？真係沒有最衰，只有更衰！佢製造緊電視界嘅瘋狂歷史，放心，必定史上留名。（亞視應先搞好製作？）要搞兩年前就搞咗！再發免費電視台牌，佢一定死硬，如果唔係使乜咁騰？」

前亞姐冠軍陳煒則說：「講到亞視歷史，啲藝人熟過個老闆，我覺得上堂冇必要，識得被炒者之一張啟樂，佢永遠早到同熟讀劇本，又識填詞，係全面藝人，唔明點解要炒！」問到是否覺得亞視搵藉口炒人？她說：「唔知呀！係就直接啲，使乜搞咁多小動作。（引薦張啟樂入無綫？）我又冇咁嘅能力。」此外，曾為亞視拍劇救亡兼現與亞視合作外判節目《娛樂CIA》的監製鄧特希笑言亞視冇得幫：「佢哋好識善用資源，嚟嚟去去見到都係嗰幾個演員，自己高層都表演埋，我諗要上堂嘅可能係唔專業嗰啲好似盛生、王生！（傳佢哋有份教亞視歷史！）好得意，人哋五十年歷史但唔等於同佢哋有關係！」他又強調從來不是亞視人，並說：「之前認為亞視有發展空間，但慢慢發現佢定位係全力得罪香港觀眾！」

張文慈微博開火

至於一直力撐娘家的前亞視人張文慈也忍無可忍，連發兩個微博鬧爆王征：「亞視為何有今日，不是藝員有問題，不是公司有問題，而是老闆很有問題......看見王征上次強迫員工出來跟他遊行開始，就已經替亞視員工感到無奈！」對於亞視被圍插，高層盛品儒昨日繼續企硬：「外人有外人鬧，我哋有我哋制度，公司係想增進藝人對公司背景嘅了解、發展方向同演藝技巧，外間可能會覺得苛刻，但亞視藝人管理一直差，定制度係想更有秩序。」他聲稱與五名藝人解約是整個管理層的決定，並表示旗下藝人已陸續加簽條款配合公司培訓。