張繼聰「大愛」戰低潮

歌手張繼聰（Louis）早前推出新碟，發揚「大愛」精神。雖然他樂觀積極，但亦曾經歷被網友及某些媒體抨擊的低潮。不過，他經過自我反省後，已懂得放下和寬恕別人，其豁達思維與專輯同出一轍！

張繼聰（Louis）早前推出新專輯，當中宣揚「大愛」精神，問到他為何有這個創作概念？他說：「『大愛』係無條件嘅愛，係好多人想得到嘅嘢。但係生活中好多愛都唔係無條件，因為大家都抱住『你』同『我』、『對』同『錯』嘅概念。但當我哋睇嘢嘅眼光唔再有分裂，而係全部合一，咁就一定可以去到大愛！例如《雙彩虹》呢首歌有七色，但雖然我哋係唔同顏色，但合埋先係一體！」

學習寬恕

Louis生性豁達，但亦曾遭到報道或網友抨擊。面對輿論，又要發揚大愛精神，豈不是很矛盾？他說：「其實唔矛盾！當然文字暴力都屬於暴力嘅一種，但有時我會反省我生活嘅其他面，有冇呢啲暴力？可能我同人吹水時都不經意會講人壞話。當我再仔細觀察自己，原來自己都有暴力念頭，所以個重點唔應該係人哋點對我，而係我點去睇件事！可能有網友唔知佢哋嘅留言係會傷害到人，但當有一日知道我曾經犯過同一樣嘅錯，我就識得寬恕人，或者忘記！」

提到囝囝張瞻，慈父Louis明顯「有仔萬事足」。他指每件跟兒子共度的小事，都會令他感動：「其實做爸爸對住個仔，已經覺得好幸福！今朝我臨返工之前佢攬住我，跟住佢畀我阿媽話：『你唔好阻住Daddy瞓覺！』然後佢好快畀我阿媽捉咗出去。雖然當時我攰到眼都睜唔大，但都覺得好窩心！」