Super Girls自爆聖誕奇緣

人人都擁有不同的聖誕經歷，跳舞組合Super Girls五女都不例外，隊長Aka自爆曾有追求者於空中肉麻示愛，甜到爆！成員Heidi卻於聖誕前夕被飛，慘！

跳舞組合Super Girls五位青春成員Aka、Cheronna、Yanny、Heidi及Jessica入行後首過聖誕節，雖然要在工作中度過，她們卻感到非常興奮！提到未入行前最難忘的聖誕節，隊長Aka有着童話式的經歷，她透露兩年前有男生於直升機上示愛，認真巴閉！Aka說︰「記得嗰日係平安夜，佢約咗我去澳門玩，仲Book埋直升機，點知佢喺半空示愛，拎住一條頸鏈同一對耳環話：『雖然鍾意一個人唔需要擁有佢，但依家我想自私啲！』真係好冧，咁就一齊咗喇！」其他成員聞言即「嘩」了一聲及大表羨慕，但Aka表示最後因價值觀不同而分手。

Heidi平安夜甩拖

有人歡喜有人愁，成員Heidi的經歷卻慘到爆，她透露男友竟於聖誕節前夕向她提出分手，令她喊住過聖誕，她更裝出傷心樣說：「聖誕前一日佢同我講分手，當時極之唔開心，依家諗番可能佢唔想買聖誕禮物畀我啩，結果我嗰年成個聖誕都好唔開心！」身旁的Cheronna和Yanny即安慰她說︰「依家有我哋陪你，今年我哋一定過得好開心！」