成龍火山玩命

成龍在英皇電影的新片《十二生肖》中，再度發揮他的拚命精神！他上飛三萬呎高空，下闖熔岩噴發的火山絕地，他指這齣「最後一部搏命動作片」，險些成了他的「告別作」。

成龍在英皇電影新片《十二生肖》中，再繼續玩命！這位獲健力士世界紀錄列為「表演最多特技的演員」（Most Stunts by a Living Actor）的「玩命專家」說：「今次除咗高空跳降傘，仲去咗火山實地取景。我好注重真實感，盡量現場拍，但我58歲喇！真係有諗過拍完呢部退休，我唔想有朝一日，觀眾望住個銀幕話：『好心唔好再打啦！』喺火山拍戲，啲熔岩係咁噴，工作人員叫我小心。我喺度諗，如果啲岩漿噴埋嚟，我喺現場就咁死咗，件事幾靚，幾圓滿！但我自問呢套戲係我十年來最好嘅作品，又唔捨得死同退休！」

成龍不只在動作上力求突破，更在劇本上耗盡心思，令電影可觀性大增。他說：「我喺戲裏面放咗好多Message，當年八國聯軍打中國，點解我安排戲中嘅現代海盜有唔同國籍嘅人？點解有句對白話『唔可以三、四個打一個』？希望年輕人睇得到啲Message。」

林鳳嬌捨千五萬拒出鏡

散場嗰段獨白係我心聲，我每個危險動作做完都有可能下半世要坐輪椅。房祖名本來想將我歷年作品剪成MV，加喺段獨白度，但我唔想咁刻意。（搵林鳳嬌客串，勾起佢戲癮？）冇，佢根本唔想出鏡，七、八年前有洗頭水廣告出1,500萬搵佢，佢都唔制，所以我哋合演，只此一次，永遠唔會再有機會。」