古巨基出局寸爆叱咤

今年走勢強勁的古巨基，盛傳因遭電台打壓，竟未能躋身「叱咤樂壇我最喜愛的男歌手」五強，引起基迷公憤，直指電台黑箱作業，前晚基仔也寸爆電台，DJ森美更斗膽倒戈相向，公然踩自己電台不是。

今年有兩首大熱作品《告別我的戀人們》及《戀無可戀》的基仔，竟未能打入「叱咤樂壇我最喜愛的男歌手」最後五強，惹來非議，有傳基仔被電台打壓，引起基迷不滿，狂插電台黑箱作業！前晚電台為基仔舉行《告別我的戀人們音樂會2》，但基仔完全冇面畀，公然寸爆電台。

首遇冰鎮底褲

主持人森美談到「獨男」五大特徵其中一項是「基仔」時，基仔即有骨地說：「呢個就預我，其他又唔預我？」森美為安慰他，竟敢踩自己電台：「五強其實係虛名，唔代表事實嘅！」但基仔意猶未盡繼續寸嘴，自爆玩過一種Online Game，曾打入全球第八位，又借意自嘲：「都係入唔到五強！」

兩人又大談「剩女」，森美細數剩女特徵時，竟敢將公司高層陳志雲擺上台開玩笑：「好似講緊陳志雲咁！」笑爆全場。前晚小插曲不斷，基仔因耳機跌落地，工作人員連忙幫他整理，但唱罷歌曲後基仔忍不住高呼：「攝咗落底褲度呀！」完騷後他笑說：「好奇異！入行廿年第一次遇到，凍冰冰，差啲頂唔順！」

Lorraine戴罩有因

問到寸爆電台，是否介懷未能躋身五強？他說：「度Rundown時度嘅，森美應對好快，其實都係搞Gag！」他又自認大男人，不准女友着裙，即被取笑得力助手Lorraine經常戴口罩，基仔說：「你好嘢！病咪帶口罩囉！」