肥溫人釘人迷暈城城

奧斯卡金像影后「肥溫」琦溫斯莉（Kate Winslet）旋風式襲港31小時，先後以兩襲貼身衫出席活動，當中現身馬場所穿的火紅露波邊貼身裙更一度凸點，辣慶馬迷！視肥溫為偶像的郭富城，把握機會與偶像密密斟，陪肥溫來港的男友Ned RocknRoll即時金睛火眼（目及）到實！

肥溫前日以Longines優雅形象大使身份來港，昨晨10時許，她以一襲全黑連身裙為品牌的銅鑼灣旗艦店剪綵，其後換上火紅透視裙，在維珍航空老闆外甥、男友Ned陪同下到沙田馬場出席首屆《浪琴表香港國際賽事》，令人眼前一亮！她身上的連身裙，肩膊、腰位、背部以至胸側都是透視喱士，真空上陣的她更一度凸點！

沙圈密密斟

她與男友到沙圈參觀時，巧遇同是品牌優雅形象大使的城城，首度見偶像的城城與肥溫傾唔停，又與品牌總裁合照，沙圈內的馬主亦紛紛取出手機拍攝，而Ned非常識做，刻意與肥溫保持距離，以免影響女友工作，但視線一直沒有離開，拍照後更即時拖實女友返廂房。其後，肥溫上台擔任第8場賽事的頒獎嘉賓，有馬迷以廣東話大叫「肥溫」，未知她是否明白，但仍友善地向觀眾席揮手回應。

無緣拉頭馬

城城坦言由電影《鐵達尼號》開始已成為肥溫Fans，更激讚對方的演技冇得頂：「佢係一個好多變化嘅女演員，我想請佢睇我有份做嘅《寒戰》，仲想同佢一齊拍廣告，我會同品牌老闆傾一傾。」他本邀請肥溫為其愛駒「愛的呼喚」拉頭馬，肥溫亦答應，可惜「愛的呼喚」最終跑「梗頸四」，而曾志偉的愛駒「卡加大師」則跑第三。對於愛駒未能跑出，城城坦言若有所失：「原本嗰個騎師過唔到磅，臨時改咗另一位，可能個騎師同隻馬唔熟啦！希望馬迷包容，隻馬只係第3次出賽，好朋友都有傳短訊畀我話好可惜同鼓勵我。（包括女友熊黛林？）冇！」他透露晚上會與母親提早慶祝生日，但熊黛林冇份出席。

而肥溫於下午5時許離開馬場後，與男友乘車直返酒店，落車時，她脫下在馬場佩戴的頭飾，並與男友手拖手步入酒店，然後於晚上11時許坐夜機返倫敦，結束香港之旅。