阿倫阿叻撐行志偉

黃浩到底有冇被摑？捲入這場風波的曾志偉自發表「食屎狗論」後，同樣是福祿壽的陳百祥（阿叻）和譚詠麟（阿倫）同仇敵愾，發表偉論為志偉護航！除阿叻倡議與志偉籌20萬冚人做慈善外，阿倫更把事件歸納四點，認為志偉打人是「逆轉潮流」！而黃浩亦打破連日來的緘默，以WhatsApp回覆本報痛陳被萬箭穿心！

捲入黃浩被摑風波的曾志偉，前日發表「食屎狗論」，暗示心情受到困擾，身為志偉死黨的阿叻和阿倫為撐好友，同氣連枝發表妙論對抗外敵。與志偉一同出席《歡樂滿東華2012》的阿叻評論事件時更是妙語如珠，句句夭心夭肺！

當被問到對志偉捲入風波有甚麼看法時，阿叻認為被摑者可能是志偉，他說：「志偉咁純，係一隻小羔羊，會唔會係大家飲醉咗，搞錯咗，其實佢先係畀人揼嗰個，佢次次醉畀人揼都係我報警！」阿叻愈講愈興奮，借金剛和王浩信作無限比喻：「打金剛十幾巴，劉松仁打王浩……信13巴都冇人報警，無論姓王（黃）浩都畀人冚，係咪呀？」

玩埋王浩信

阿叻再為志偉護航說：「志偉鵪鶉咁嘅？又唔敢答唔敢盛，我覺得佢哋醉咗，我唔喺現場，大家又唔喺現場，大家講吓算啦！我覺得都係小事化無，開開心心，咪搞咁多嘢！」最後他更講笑籌錢冚人做慈善：「早知頭先叫嗰個嚟，我哋每人捐一萬一巴，冚王浩信都13萬，整20萬出嚟，我同志偉一人出10萬，整兩巴搞掂啦！一萬一巴做慈善，問佢制唔制，依家呼籲佢入嚟！」問究竟所指的是王浩信還是黃浩？阿叻說：「我唔知叫乜名，唔識佢，我以為一直講王浩信！」他又表示早前寓所遭爆格，被偷去十多萬元現金券和心愛望遠鏡：「養6隻狗都唔掂，睇嚟要養老虎！」

而黃浩昨晚終於打破連日來的緘默，以WhatsApp回覆本報，被問到是否影響夫妻感情？他說：「同太太嘅感情未受影響，太太仍對我好信任。」被問到現在全世界都指他不對，會否為挽救形象而公開道歉？他即連續再回覆：「一年多來一直被人滋擾、恐嚇甚至妨礙司法公正、刑事恐嚇、襲擊、非法禁錮兼再人身攻擊及名譽中傷，你覺得有天理嗎？」他又說：「被警方召去問話的人居然講大話扮報警又是甚麼人才做得出呢？」

接力發妙論

而阿倫昨日與彭健新到馬場捧志偉愛駒「卡加大師」出賽時，阿倫早有準備，發表四點妙論，分析黃浩風波，他說：「佢（志偉）都講晒啦！但我有四點，ABCD！A係我印象中志偉角色唔係咁，佢應該係畀人打，唔係佢打人，唔通依家係逆轉潮流；B係志偉之前已皈依我佛，佢法號叫覺悟，如果佢郁手打人，咁係咪佛都有火呢；C係可能佢唱學友嘅歌「輕撫你的臉」，可能就係咁同佢講『細佬，唔好搞咁多嘢』；D係……佢哋兩個有好多事要處理，畀多啲空間佢哋！」講完一輪，阿倫還與彭健新示範《輕撫你的臉》。

愛駒最後跑得第三的志偉心情輕鬆，又豎起拇指企定定讓記者拍照，問到發表「食屎狗論」後有否收到電話？志偉說：「冇呀！《東華》都做到好夜！」而他在《東華》接受訪問時表示沒有就黃浩紛爭而要求演藝人協會幫手，他說：「冇呀！因為佢哋冇要求，除非演藝人協會要求我哋，否則唔會主動咁做！」