伍靜麗尋寶從巴黎開始

模特兒伍靜麗（Angie）近年成為時裝品牌的新寵兒，而她至愛的收藏亦與時尚有關，Angie說：「我依家好鍾意收集Vintage服飾，因為有段時間去咗巴黎發展，住喺Hotel de Ville附近，嗰邊有幾間Vintage店，有時冇Job做又唔想留喺屋企，咪行吓Vintage店，打發吓時間！喺入面好似尋寶咁，有時會搵到正貨，又有牌子又平到笑，香港真係搵唔到，就算搵到都貴到飛起，畀人炒高晒啲價，所以喺香港行Vintage店唔會有收穫！」

現已珍藏近百件Vintage服飾的Angie表示，每件都是獨一無二，笑言難有撞衫的尷尬場面出現：「歐洲好興Vintage店，每逢歐遊，Vintage店都係我嘅必到地，買極都係有限錢，唔會肉痛！」她又表示這些始終是二手服飾，為免孳生細菌，買後都會經特別消毒處理。