Naomi妝家本領
化妝品有神奇功效，可以瞬間令女生「易容」變靚，又可令天生麗質的女生錦上添花。李思捷緋聞女友Naomi身處美女如雲的娛樂圈，自然明白化妝的重要性，故不時鑽研化妝技術，為自己化出一片彩虹！
愛以「o靚模妝」示人的Naomi（馮鎵瀠），大眼仔及假眼睫毛可算是其化妝良伴，今次她特別教大家化一個近年大熱的「無辜大眼」妝，還找來表妹Lego作示範，她說：「我覺得化妝係一種禮貌同藝術，如果天生個底夠靚，化完妝就會更加靚，如果本身唔靚女，化完就可以變靚！今次我會幫表妹改頭換面，佢得22歲，好啱呢種可愛妝容，個妝重點係對眼，所以假眼睫毛好重要，上下都要黐！」
戰鬥格箍男友
放下工作的Naomi愛以素顏示人，歷任男友都愛其淡妝甚至素顏，她說：「佢哋通常都叫我唔好化妝，覺得化完會好多人望我，唔化個樣反而細啲，但依家個男朋友好靚仔，所以要經常化番個靚妝襯佢，咁先天生一對！」原來Naomi是首個香港女藝人參與台灣綜藝節目的卸妝環節，當時仍在台灣發展的她說：「台灣好多綜藝節目都鍾意請女星上去落妝，好彩我嗰次評價都唔錯，大家覺得我妝前妝後唔係差好遠，但當然化咗妝會精神啲同靚啲！」
名師出星徒
Naomi的化妝技術並非無師自通，其實背後是有位星級化妝師Ayu Pak教路，Ayu曾跟隨法國化妝大師Anne Barduad學化妝，又曾於日本著名學府MODE學園名古屋校深造化妝造型藝術。Ayu擅長新娘化妝、創意妝及舞台妝等，而曾與她合作的藝人包括Angelababy、Janice Man及熊黛林等。
愛美是女人的天性，Naomi正努力學習如何靚上加靚。
上妝前
上妝後
經過Naomi的精心炮製，表妹Lego化妝後Sharp爆，掂！
面
先用護膚品作日常護理，再用遮瑕膏遮蓋暗瘡印等瑕疵，用粉底液打底。
用較深的粉底修容以塑造瓜子面，並用打光粉在蘋果肌位置打亮，可提升皮膚光澤。
眉
每個人的左眉和右眉都不完全對稱，先挑選自己較喜歡或較順手的一邊落手畫眉。
只用眉筆畫眉的話，線條會較硬，但再塗上眉Gel，雙眉即會又靚又自然。
眼
先塗上Eyeshadow Base，讓眼影的顏色更突出，繼而塗上粉狀眼影。
畫上下眼線，化「無辜大眼」妝要將上眼線的尾部微微向下。
用睫毛夾夾翹睫毛，再黐上假眼睫毛。
最後塗上睫毛液，將真假睫毛結合在一起，令效果更自然。
唇
先用唇筆勾畫出唇線，這樣可令嘴形更美。
最後塗上唇彩，令嘴唇更顯豐滿。
Ayu Pak（左）、Naomi