Lisa S. B女10個名任揀

名模Lisa S.昨日與 Ana R.、Rosemary、王敏德、尹子維、Jocelyn及老公Anthony出戰慈善沙灘比賽，身懷六甲的Lisa只做啦啦隊隊長，由Ana R.頂替落場。問到懷孕後身體狀況有何分別？Lisa透露胃口大增，三個月內增磅10kg，為求食得健康，肚餓便吃少許：「朋友見到我都不停叫我食！」她還未為腹中囡囡改名，因有朋友試過BB出世後，才發現名字不適合而要重改，她說：「我會搵定10個名等BB出世再揀，我改英文名，中文名交畀老公改，因為可能有特別意思或要跟族譜！」而王敏德笑言被停直升機牌後大感技癢，外出時惟有靠行路。