黃浩離奇改口風

引發「藝人集體吸毒」風波的黃浩，前晚突然全面改「口供」，由「有」變「冇」，表示沒有藝人吸毒短片、沒有看過該短片及沒有見到任何人在其餐廳內作非法行為，並解釋閉路電視所拍攝的是員工搬汽水的情況。

黃浩曾陸續發放消息，指有藝人在其餐廳內「集體吸毒」及有閉路電視以至有人以手機拍下過程，以及警方介入調查，而事件引起娛樂圈不少風風雨雨，惟前晚黃浩到警署後被記者包圍追問時，他推翻之前的言詞，由「吸毒事件」變為「濫收費用事件」，黃浩聲稱有前員工以手上持有一段VIP房「藝人集體吸毒」短片向他勒索20萬元，不過，黃浩反口表示只是外界傳聞而非出自其口，又將「勒索」變「恐嚇」：「其實係冇人勒索我，應該咁講，係冇前員工勒索我。（意思係有人勒索你，但並非前員工？）係有人恐嚇我。（為乜事恐嚇你？）唔講得。（恐嚇同勒索唔同，之前話勒索你20萬？）係有人問我話有兩個版本，一個係5萬，一個係20萬。」其後黃浩又說：「呢個前員工係邊個我唔可以確認，係咪用手機拍片，我唔知，淨係透過第三者問我有冇興趣買，我冇興趣買，買嚟做乜？我都唔知真定假。」

「冇見過非法行為」

曾表示有睇過片及有片在手的黃浩，前晚卻多次說：「我冇片，我亦冇睇過條片。我冇見過任何人喺我餐廳內做任何非法行為。」他解釋有的只是食肆閉路電視拍到員工出出入入搬汽水情況：「因為去年有人投訴我哋間食肆濫收費用，我重睇段閉路電視，睇番員工攞咗幾多罐汽水出嚟，攞咗幾多罐入去VIP房。」

至於曾表示見到有人捲煙以及枱面上有粉末與藥丸，黃浩就以「我十年前喺外國見過有人捲雪茄」以及「應該係解酒丸」作解釋。

另外，黃浩口中所說的搬汽水閉路電視片段，已於去年交給警方：「因為發生濫收費用事件後，有員工家屬擔心員工安全，所以想尋求警方協助，經理問我意見，我覺得應該報警。」

「件事超越承受範圍」

黃浩稱原本只是有關濫收費用的爭拗，以為去年已經解決，但想不到事件會演變至此：「件事已經超越咗我應該承受嘅範圍，唔應該發展到咁。呢兩個星期我好委屈，見到自己畀人整蠱，有啲人做咗啲嘢影響到我家人安全同受到威脅。件事被放到咁大，我已經息事寧人，我做埋和事老去幫人解釋，但冇人認同，反而將所有事推喺我身上。我做錯啲乜？如果我有錯我會承認，我冇整蠱過任何一個人，冇公開傷害或誹謗過任何一個人。」他又指去年發生濫收費用事件後，有中間人跟對方和談，但對方拒絕，今次雖然有朋友出來講話，但黃浩婉拒好意，因沒信心可和解。