志偉呻食屎狗亂吠

自捲入「黃浩被摑風波」後，潛水兩日的曾志偉昨日終於現身東華綵排，心情靚爆兼直豎拇指！雖然未有回應掌摑事件，但他強調心情未受影響，反而因近日鄰居飼養的「食屎狗」晚晚亂吠而大感困擾！

曾志偉日前出席前港姐鄭嘉雯與球會晨曦班主兒子周志豪的婚宴，但最後捲入徐淑敏老公黃浩被摑風波，坊間更傳出多個版本，令事件倍添迷離！雖然坊間眾說紛紜，但近日忙於拍攝賀歲片的志偉連日來對事件保持緘默，前日更甩底《歡樂滿東華2012》拜神活動避風頭，直到昨日才首度現身為《東華》進行總綵排。活動原定下午一時開始，姍姍來遲的他竟於下午三時才出現，但心情明顯未受連串是非困擾，除了笑容滿面心情靚外，更豎起手指公作「Good Show」狀！

曾與Eason聯絡

志偉全程採取封嘴態度，當記者問及與黃浩的風波時，他只以「無可奉告」來回應：「因為有人報咗案，唔可以講番當晚嘅事。（有人（指黃浩）反口都唔講得？）都唔得，講第二啲。」當問及陳奕迅（Eason）與徐濠縈前日開記者會力證清白，志偉亦不願多作回應，只透露曾與Eason通電話：「Eason做完記者會打畀我，我都話好呀！各有各做！我意思係佢去上海，我返TVB做嘢。」問到是否要再到警署助查？他亦表示不能透露。

強調未有就事件影響心情的志偉，訪問中途突然扯開話題講古仔，指近日最感困擾的是受鄰居飼養的「食屎狗」騷擾：「屋企後面有戶人養咗隻狗，晚晚吠，成個屋苑都投訴，但鄰居話隻狗好犀利嘅，見到有賊有鬼先吠。我話我呢度治安好好o架！唔會有賊o架！佢話一定有，否則係內鬼，我就好奇怪，前晚喺屋企開晒燈，又冇賊又冇鬼吖！佢就拉番隻狗走，話其實隻狗睇唔到嘢，乜都睇唔到o架！隻狗仲生瘌痢添！咁鬼核突！我問點解仲養呀？原來隻狗唔使食狗糧、食飯，淨係食屎嘅啫！哦！咁大家都原諒佢啦！」

至於昨晚的《歡樂滿東華》中，擔任大會司儀的志偉參與開場表演的「六國元帥賀東華」環節，與薛家燕、謝雪心及關菊英等以大戲造型粉墨登場。除了功架十足外，他還以招牌式超高音哼出台詞，席間又開玩笑指「認唔到自己」，種種迹象看來志偉的心情未受捲入掌摑是非而受影響。