羅力威當基仔屋企人

羅力威昨日出席活動，再澄清沒因師兄古巨基未能入圍「叱咤我最喜愛的男歌手」五強而內訌，而英皇行政總裁吳雨亦力撐基仔沒受電台打壓。

羅力威、洪杰、Kellyjackie及組合Super Girls等昨日為免費音樂表演平台「LIVETUBE」新聞發布會擔任嘉賓，羅力威表示對與音樂有關的活動都會瞓身力撐：「佢哋首主題曲都係我作，身為音樂人好支持呢啲音樂活動。」洪杰亦表示期待在LIVETUBE開騷。

以「新人王」姿態殺入「叱咤我最喜愛的男歌手」五強的羅力威，不怕跟未能入圍的師兄古巨基關係轉差，他再度澄清兩人關係不變，更以「一家人」比喻雙方關係：「唔會因為傳媒報道而令公司所有人唔開心，公司就好似一個大家庭咁融洽，我哋冇唔妥。佢係一個好歌手，我好鍾意佢。」

否認遭電台打壓

同場的英皇行政總裁吳雨對於基仔未能入圍大嘆失望，但不認為基仔遭電台高層打壓：「基仔冇份都幾失望，我都唔知點解。（基仔畀電台高層打壓？）唔會嘅，咁大一個電台，同歌手、唱片公司關係都好好，合作無間，公道自在人心，我唔覺被打壓。」

此外，羅力威於活動後出席《十大中文金曲》記者招待會，被要求在台上跳舞，但舞姿生硬，主持人取笑他猶如做早操，引得哄堂大笑。