超雲辦嫁妝主攻巨鑽

賭王三房千金何超雲，盛傳明年嫁陳山聰，繼早前傳出賭王送四億豪宅作嫁妝後，前日三太陳婉珍和超蓮亦出動陪超雲到中環豪揀珠寶，待嫁的超雲全程紅粉緋緋，雀躍地埋首揀鑽飾。

賭王千金何超雲和陳山聰拍拖以來愛得癡纏，今年八月更傳出山聰在葡萄牙向超雲求婚成功，兩人計劃明年結婚。消息傳出後，先有三太表態稱不會反對，再傳賭王豪送價值四億豪宅作嫁妝，連超雲亦直認賭王有催婚，一場世紀婚禮隨時準備就緒。前日下午約4時，超雲和超蓮齊齊現身中環，雖然近日天氣清涼，但兩位千金均抵得冷，超雲穿短褲襯長Boots露出一截雪白大髀，超蓮則穿上印有SICKGIRL字樣的長袖穿窿露背Tee。兩姊妹結伴步入太子大廈一間珠寶店會合三太，齊齊為嫁妝張羅。

未幾職員發現記者拍攝，即主動落簾擋鏡頭免嫁妝曝光，由縫隙望入，只見超雲在三太陪同下不停試超大粒鑽戒。期間超蓮伸出手試不停，揀完戒指，超雲再向耳環埋手，三人揀珠寶揀足一粒鐘始步出。問到買了甚麼？是否買聖誕禮物給何生？三太搶答：「係呀！」再問到自己有否買嘢，超蓮鬼馬地代記者問超雲：「自己有冇買嘢呀？」超雲欲轉移視線說：「你有！」此時超蓮反駁：「你冇咩？懶係！」篤爆家姐買嫁妝唔認，三人再笑騎騎上車，由司機接載離開。

兩姊妹互笠高帽

當晚回家後，超蓮在微博上載與超雲的合照，並問：「Do we look alike？（我們相不相像？）」超雲即指超蓮是她「心中最美的妹妹」，超蓮亦開心地說：「你也是我最美的姐姐。我們雖然五官很像，但就是有着不同的感覺，不同的型，卻一樣美。」但對於為超雲辦嫁妝，三太的公關代為回覆，指因想扮得靚靚出席賭王壽宴，三母女才買鑽飾裝身。