趙碩之蕭正楠誤闖情感禁區

蕭正楠與趙碩之今年皆不幸命犯「小三」，幾乎誤踩地雷。前者被指介入陳豪及陳茵媺的戀情；後者險介入別人家庭，幸及時發現斬纜保「清白」！

趙碩之（Wylie）年初與拍拖四年的侍應男友分手後，旋即被拍到在夜店攬啜「金龜」新歡、鐘錶富商Danny，其後Danny被揭發已有家室，她得悉後火速斬纜，以免背負「小三」之名：「最初只知佢有個仔，其實係我冇問清楚，點知啱啱發展階段已經畀人寫到係『小三』！做呢行特別係女藝人，好避忌畀人咁講，所以斬纜斬得好快！」她笑言身邊人最初得悉她拍拖時，均紛紛祝賀她：「因為對上一次拍拖收得好密，個個以為我Dry咗好耐，一知道我有『新歡』都恭喜我，老闆仲幫我講好說話，話我唔會因為拍拖而忽略工作。」

前度無限好

險墮「小三」陷阱的Wylie表示經此一役，以後會睇清楚才作進一步發展：「其實最緊要係清清白白，以後都會睇定啲先。我係一個對感情好專一嘅人，當然期望對方都係！」她強調與Danny還是朋友，仍有見面，但每次都是一大班朋友的聚會，天蠍座的Wylie並無其星座的「復仇」特徵：「天蠍座畀人感覺係會復仇，因為佢哋一旦拍拖，就會好投入一段感情，容易受到傷害，但佢哋受傷害唔會喊，所以要搵其他嘢轉移視線。」Wylie透露跟很多前男友都能繼續做朋友：「20至24歲係女仔最燦爛嘅時期，男仔嗰個時候係冇成就，個女仔肯同你一齊成長，就算分手都變咗屋企人，好感激所有同過我一齊成長嘅男朋友！」

謝絕釣金龜

現年25歲的Wylie依然青春無限，並不急於找真命天子，自言感情方面只是個「細路仔」：「好多人話娛樂圈係大染缸，我想至少喺感情方面可以單純少少！」對於擇偶條件，她認為最緊要是對她溫柔，很多港女視嫁入豪門為終極目標，Wylie反而嗤之以鼻：「個社會依家好現實，講真就算富豪個仔嚟追我，都要睇吓大家相處合唔合適，唔會為咗入名門而違背自己嘅意願！」感情上，Wylie可以來得很快，一撻即着，但現階段她開始「抖暑」，慢慢物色對象，希望能夠早日找到真命天子。

後記：初試啼聲

Wylie早前參演完音樂劇後，開始對唱歌感興趣，更希望作一首屬於自己的歌：「最鍾意做戲，之前界定自己要做演員，點知依家知道唱歌竅門後，發覺唱歌唔係想像中咁要逃避，之後想挑戰自己唱吓快歌！」

無綫藝人蕭正楠（Edwin）瀟灑不羈，理應「溝死女冇命陪」，偏偏Edwin卻是「鱷魚頭老襯底」，即使糊裏糊塗被標籤為「小三」仍懵然不知！Edwin去年中與陳茵媺（Aimee）合作拍劇而傳緋聞，被指介入Aimee與陳豪（阿Mo）的戀情！問到被「屈」成小三，會否心有戚戚然？Edwin笑說：「唔會！因為同Aimee都好清楚咩事，清者自清！報道出咗後Aimee都有同我講Sorry，我同佢講唔緊要，大家係朋友！」現時Aimee與阿Mo打得火熱，更不時以情侶檔現身，Edwin笑言終可鬆一口氣：「同Aimee拍《仁心解碼2》時佢已經名花有主，大家都叫佢做『Mo嫂』，同佢更加冇芥蒂，玩得埋啲都唔驚人講！」

唔避得咁多

不過惹桃花的Edwin，月前與苟芸慧演對手戲時又傳出緋聞，他說：「之前都有澄清過，唔好再講啦，驚佢又喊！其實佢係好Pure嘅女仔，好畀心機拍戲，大家都知佢中文唔係咁好，都會好就佢！」Edwin每次與靚女合作都會傳緋聞，問到會否因此而避忌？他坦言只求無愧於心：「冇需要避忌，因為咁樣做人好辛苦，好容易變做獨孤精，做朋友本身都唔應該介意對方係男定女，如果啱傾就傾多兩句，唔啱咪各自專注番工作，唔需要諗太多！」 Edwin早前與緋聞女友何傲芝被揭雙雙炒車，他亦澄清雙方只是朋友關係，笑言現時與工作拍拖！

粗口當「補品」

劇接劇的Edwin最近演出台慶劇《大太監》而令人刮目相看，他卻大爆當中的辛酸：「有幕講我被打斷手腳趕出宮，落雹時要喺餿水桶執垃圾食！最難忘係我咬斷咗條雞骨，點知原來條雞骨係未熟晒嘅，搞到我成口都係雞血，勁腥！（怕有禽流感？）驚o架，嗰桶餿水係由捏爛嘅飯、肉碎等加水整成嘅，食完都驚肚屙，好彩最後冇事！」但他笑言甘願為好角色捱打：「呢個角色好有發揮，因為係做黎耀祥徒弟，一個好純好乖嘅角色最後變成好壞好奸，好大挑戰！」對於會否怕被定型為奸角？Edwin說：「反派多啲挑戰，唔介意做忠定奸嘅角色！之前喺《天梯》演奸角都畀網友用粗口狂罵，話我個角色點解可以咁乞人憎，我都當係另類嘅讚賞，哈哈！」

後記：10年在望

入行10年的Edwin近年於無綫嶄露頭角，被視為「飛躍進步獎」的頂頭大熱，問到是否有信心奪獎時，他說：「好多謝一班支持我嘅觀眾，當然希望有機會，因為入行十年都冇拎過任何有關演戲嘅獎，都希望有個證明畀自己！但今年拎唔到都唔會失望，因為仲有好多機會，其實我哋一班《大太監》嘅演員最希望係拎到『最佳劇集』！」