阿詩站出來：我係同志

歌手何韻詩宣布出櫃了！一向性取向成疑的何韻詩，多年來不乏女性「蜜」友，昨日她偕父母及一眾「志友」參與遊行，終於承認是女同志，在4千人面前喊住高唱斷背歌，更高呼出櫃：「我係同志！」成為首個出櫃的本港女歌手！

今年繼歌手黃耀明、名人趙式芝及議員陳志全（慢必）等發表出櫃宣言後，現年35歲的何韻詩昨日都站出來了，成為本港首個出櫃女歌手！由出道至今，阿詩的打扮或歌曲都充滿同志味道，加上多年來不時與女星傳緋聞，同志身份早已呼之欲出！連日來阿詩在微博呼籲同性戀者出席昨日在銅鑼灣舉行的《同志是敢的》遊行，雖然期間屢遭河蟹，但她心意已決，前晚更在微博賣關子：「明天，是重要的一天！」原來她已邀請父母及一眾圈中好友黃耀明、慢必、徐濠縈、黃偉文及余迪偉等做見證！

本港首個出櫃女歌手

一身中性打扮的阿詩由銅鑼灣起步，當時問她會否趁機Come Out？她仍語帶避忌：「陣間你哋就會知！」但坦言連日在微博遭河蟹，感到不受尊重，其後記者要求阿詩與父母（菇爹菇媽）合照，身邊的明哥即時被詩父攬實：「呢個一定要攬，不如我哋打個茄輪先！」遊行大約1個多小時結束，阿詩與4千名同性戀者走到中環終點站，她應大會邀請上台獻唱「斷背歌」《勞斯萊斯》，當時她唱到一半已忍不住喊，並說：「今日對我嚟講非常重要！性取向只係一個人嘅小部分，咁多年嚟面對傳媒對我嘅疑問，當時覺得性取向係個人嘅事，冇乜必要標籤貼喺身上同交代，但有一日打開報紙同電視機，去到2012年應該走到幾前？但仍然發現存在歧視、偏見，一路咁沉默唔係一個選擇！」她強調因早前的「同志平權」公眾諮詢辯論被否決才站出來！

阿詩一番感性言論，全場同志高呼喝采，她續說：「每個人都有好多顧慮，包括工作同私人朋友同家人，我知道講咗會失去好多機會、好多麻煩，但都希望加入我嘅聲音！其實我呢樣嘢應該喺幾年前就要做，不過搵唔到合適嘅機會，但今日充滿愛、和平同包容嘅環境下，有我嘅朋友、家人……」此時她再度落淚，然後深呼吸才說：「我有義務責任，為愛去爭取和平同包容，所以企出嚟，我好驕傲喺度同大家講：『我係同志！』」全場即高呼支持阿詩，不停咬唇平復激動心情的她，獲好友上台合唱《光明會》後，即落台與父母相擁，場面感人！另外，現場亦播放容祖兒的《我的驕傲》。

事前通知容祖兒

事後問到說出來是否如釋重負？阿詩說：「係呀！呢個時刻等咗好耐，首先要多謝父母，我做咩佢哋都咁支持我！（通知公司？）有打畀老闆同高層問意見。（一早決定講？）呢幾日嘅事，我都係前一日打畀阿爸，同佢講今日會Come Out，佢仲話：『Come囉，吹咩！』」她亦有通知好友容祖兒：「佢都有覆我，仲話覺得啱就去做！今次要多謝明哥，佢好多鼓勵！（知唔知祖兒同劉浩龍去旅行？）唔知，冇留意！（祖兒唔在場，美中不足？）今日好圓滿，比我想像中順利！」事後她不忘於微博留言：「有一些事情，是我們必須做的。路還很漫長，同志們，我們一起努力。今天的我，很快樂。」

路嘉欣興奮支持

唱片公司高層郭啟華與廿多位好友到場打氣：「之前同阿詩商議過，尊重阿詩決定同意願，公司好支持，公開同志身份係同志人生重要一刻！」他強調阿詩與明哥情況不同：「明哥宣布得好突然！」至於祖兒經理人霍汶希透露因祖兒不在港，不能代對方回應。而阿詩的緋聞女友路嘉欣則在微博留言：「好耶！Support！」黃秋生亦留言：「支持同志爭取權益！」