陳祉妤與愛犬助人自助

不少人都認為陳祉妤是個狗癡，但原來她從沒想過養狗，養狗只是其前夫的意願。雖然兩人分開了，但她依然肩負照顧狗狗一生的責任，還帶牠們去做狗醫生，幫助有需要的人。

好多人都覺得我係狗癡，其實我本身冇諗過養狗，狗癡程度亦比唔上我一啲真係好愛狗嘅朋友，好似GiGi（傅明憲）咁。GiGi會親自煮嘢畀啲狗食，早、午、晚三餐都照顧晒，我就交畀工人負責，我冇咁嘅時間。

最初養狗係因為我前夫想養，所以先決定養Smiley同Sweetie。養得佢哋，當然就要好好照顧佢哋一生一世，更加唔會話因為兩個人分開咗就唔要佢哋。我係好錫佢哋，當佢哋係小朋友咁，但責任緊要過錫佢哋。Smiley做過兩次大手術，醫藥費好貴，我寧願自己病都唔想佢哋病，希望佢哋同我媽咪三個可以健健康康。

驚住老人院

好開心佢哋可以做到狗醫生，因為好少西摩犬做到狗醫生，性格太熱情會嚇親人，佢哋係由細培養出咁溫馴嘅性格。一直都覺得小朋友、老人家同小動物係Helpness嘅一群，好需要人照顧，有Priority去幫佢哋，我將我嘅個人意願Commit咗喺佢哋身上，同佢哋一齊身體力行去幫人，咁樣可以好實用咁傳達到我嘅心意。雖然會有Hard time，但人哋有更多Hard time，透過探訪可以激勵自己，幫人又幫自己。有時見到老人院嘅老人家個心會好唔舒服，都會提醒自己要努力工作，唔使第時咁慘住老人院。　（全文完）

後記：貼心溫暖

陳祉妤是個很愛錫家人及朋友的人，事事都先為身邊人設想，像她跌穿頭到醫院縫針，也要為母親安排好節目才安心。她總為身邊人安排好一切，就連簡單約朋友吃餐飯，甚至是跟記者做一個訪問，都會選一個大家都方便就腳的地方，作為其家人和朋友，一定會感到很幸福！

口述：陳祉妤

筆錄：張嘉敏