煇哥邀發哥重溫好夢

「香港樂壇教父」顧嘉煇的紅館騷將於下月底展開，煇哥打算播放其電視劇主題金曲及劇集片段，更有意邀請經典劇集演員如周潤發及劉松仁等睇騷，與歌迷一同話當年！

顧嘉煇將於下月底假紅館舉行一連五場《顧嘉煇大師經典演唱會2012》，早前門票火速售罄，更引發一輪撲飛潮。煇哥除了忙於編排開場曲外，更打算為觀眾製造視覺享受。由於《上海灘》、《陸小鳳》、《網中人》及《小李飛刀》等經典劇集主題曲均出自煇哥筆下，故大會有意於騷上播出劇集片段，更有意力邀劇集主角包括周潤發、呂良偉及劉松仁等作座上客！演唱會出品人丘亞葵透露正就此事和無綫商討：「我哋同無綫傾緊買經典劇集畫面喺Concert播，仲打算請劇入面嘅演員一齊嚟睇騷，同歌迷一齊回味光輝時刻。」

爭取加場

為滿足觀眾視聽之娛，演唱會舞台設計亦花盡心思，大會將在台上安裝一盞逾40呎高的巨型水晶燈，丘亞葵透露為此不惜工本：「我哋日內會同製作公司協調點樣裝呢盞燈，由於盞水晶燈好巨型，所以保險費好貴。」

另外，丘亞葵又表示將會請二胡高手為仙杜拉伴奏《啼笑姻緣》。問到演唱會在一票難求的情況下會否加場？他表示正努力爭取加開第六場，希望為歌迷帶來好消息。