趙世曾拖新歡鋸扒

趙世曾前晚撇甩拍拖兩年多的女友隋麗娜（Lena），拖一名長髮、穿透視裝的年輕新歡，在銅鑼灣食西餐歎牛扒。趙世曾活力十足，穿西裝束起衫袖，與新歡並肩而坐，言談甚歡。他不時為女方切牛扒，煙韌地食足個多小時。離開時，兩人十指緊扣步出，新歡更當街以脷撩牙，繼而和趙世曾齊登上名車。

昨日記者致電趙世曾，問到是否有新女友？他風騷地稱不擔心Lena呷醋：「我好多女朋友o架，咁多朋友你講邊個呀？（咁佢叫咩名呀？）唔使啦！普通朋友啫。（你哋拖手喎？）拖手做好朋友。（咁Lena呢？）佢返咗內地幫我傾嘢，11月返，有時喺香港，有時喺內地囉！（你唔驚佢呷醋？）做得我女朋友係唔會呷醋！（如果真係呷醋？）唔會！」

趙世曾拖實長髮女子步出餐廳。