DaDa呻友愛難求

陳靜（DaDa）慨嘆要在娛樂圈中找個真心朋友實不容易，知己原本已沒幾個，入行後更買少見少，但曾被同行好友出賣的她慶幸仍有知心友，並與同門的鄧伊玲（阿旦）的感情深厚。

之前出寫真成日同其他對手何佩瑜（Jeana）、楊梓瑤（Carol）火藥味好重，但呢啲好似係一個遊戲規則，感覺亦好難做到朋友，入呢行後確實朋友比以前少，睇到邊個係交心，有人會疏遠我，接受唔到我之前行性感，覺得靠呢樣係唔啱。

互相扶持

記得有一個入行前嘅好朋友，大家一齊做模特兒識咗幾年，之後都有入行做模出寫真，但係邊個就唔講喇，只可以話我早過佢出，佢遲我一兩年，其實佢性格好單純，可能佢公司喺佢出寫真時要幫佢宣傳，向我講咗一啲惡意說話，之後我有問佢點解咁做，佢就話：「咁樣唔係可以互相幫助大家宣傳咩？」

雖然佢有同我講唔好意思，但我好無奈、好唔開心，好似畀朋友出賣同利用，但我覺得佢係畀人控制，說話唔似佢講，不過大家唔同公司好似少咗個朋友，雖然依家仲有偈傾，但冇以前咁親密。

如果要數呢行最好朋友，會係同公司阿旦，我哋識咗7年，係真心朋友，之前大家有感情風波都有互相陪住大家，而且好相信對方，佢又唔鍾意講是非，所以相處得好好。最記得之前我同男友嗌交時，因為情緒激動撞親隻手要去醫院縫咗3針，因為唔想畀屋企人知道，就叫咗阿旦陪我去醫院，仲陪咗我3日3夜。因為佢對我好好，會為人着想。其實，我係一個好論盡嘅人，但佢教咗我好多嘢，所以佢之前同男友分手，我都有為佢出頭，因為個男仔對佢唔夠好！（明日待續）