千嬅：儲奶慘過儲錢

產後的楊千嬅昨日復工，自言上圍升Cup不少的她真空上陣，大呻儲人奶慘過儲錢，做人媽咪甚艱難！

升呢做媽咪的楊千嬅昨日正式公開露面，出席代言的LightMAC發布會，一身黑色透視裝的她面部、腰肢及臀部仍略見肥胖，坦言尚差10磅才回復產前舉行演唱會時的磅數：「之前一直冇Keep Fit，因為要餵人奶，我依家已經儲定兩個月嘅人奶，儲奶真係慘過儲錢！」她還分享當媽媽的心得：「我人生兩個亮點係當初由護士轉做藝人，第二個就係有下一代！」

做丁妹係大成就

千嬅又表示漂亮來自女人的自信及智慧，司儀問她最想獲誰稱讚漂亮？她搞鬼地說：「老闆同老公！咁就有雙重保險，依家我同老公係平輩，如果有日喺外國畀人話我係佢個妹，咁就係我終身成就！」又笑言其他男士的稱讚亦相當重要，證明她有價有市。

千嬅受訪時相當健談，自言很久沒有說話：「生仔重咗57磅！我用7個星期減咗30幾磅，跟足營養師同餐單！」問到上圍有否升Cup？她竟搞爛Gag：「我不嬲都係『星級』！（上升個升呀！）升咗幾Cup，係個仔畀我嘅紀念品，但減肥後會縮番！（大過以前？）少少都大過以前！」她還透露下月要到北京工作：「中央電視台有個節目搵我做，為期3個月，每個星期要飛3、4日，我好唔捨得個仔，成日都要 攬住佢！」