霆鋒患癌一刻:最擔心兩個仔

謝霆鋒前晚爆出患皮膚癌,轟動娛樂圈,連父親謝賢也不知情。昨晚兩仔爺由北京返港,神態輕鬆的霆鋒多次強調健康狀況「OK、冇事」,直認得知病情時最擔心一對兒子,又指前妻張栢芝亦叫他不用擔心,還樂觀地幽他一默:「個天唔會畀啲衰人咁快死!」

謝霆鋒於前晚播出的《最佳男主角》節目內自爆患皮膚癌,成全城話題。他表示早前發現頭皮左邊黑痣變大,經診斷是黑色素瘤,醫生指是皮膚癌,要立即處理,月前他已秘密入院動手術割除「黑色組織」,並縫了五針。

昨日傍晚六時許,霆鋒與父親謝賢同戴黑超由北京返港,頭戴鴨舌帽、身穿灰色衞衣的霆鋒神情輕鬆步出機場,企定定受訪,由於戴了帽只看到「髮鬢」,並未看到手術疤痕。問到現時健康狀況?他說:「我OK、我OK!冇事,我喺訪問入面講咗我冇事,只係唔知剪接出嚟會變成點。(戴帽遮傷口?)頭髮短啫!」

機場旅客問候

至於家人是否知情?霆鋒說:「之前冇同爹哋講,佢今(昨)日睇報紙都知,好多記者朋友打嚟話好擔心,我訪問時講咗冇事,有事都唔講出嚟!(繼續療程?)唔需要、唔需要,自己冇事,件事係上個幾月前發生。(完全康復?)係!」他更表示前妻張栢芝亦知此事:「有同前妻講,前妻話冇事嘅,叫我唔使擔心,話個天唔會畀啲衰人咁快死!(佢好擔心?)冇,佢好樂觀。(出事後擔心囝囝?)係,所以好快同佢(栢芝)講。」問到得悉患病時的心情?他說:「有啲空白。(請假休息?)唔會。(拍戲錫身?)唔會,我話咗冇事,你哋唔好大驚小怪。」離開時有途人祝他身體健康。霆鋒與父親登上座駕離開機場,他於近七時返抵位於金鐘的柏舍。至於栢芝經理人指這是霆鋒私人事,栢芝不回應。記者致電霆鋒媽咪狄波拉,但轉駁至留言信箱。

而前晚霆鋒在《最》訪問內表示,自覺最失敗是不懂分配時間,少陪家人,他憶述一次與雙親及妹妹謝婷婷同枱食飯時的情景時不禁眼紅紅。他又轉述父親當年不懂理財:「阿爸話當時如果似我咁識諗,就有『兩條半彌敦道』。」霆鋒的好友車婉婉昨日同現身機場,與霆鋒公司的男同事於另一閘口離開,對好友患病一事,她只搖頭嘆息。此外,對於旗下公司捲入有關《低俗喜劇》的版權問題,霆鋒表示已交海關處理。

專案組

霆鋒從北京返港,對健康問題表示「我OK,我OK。」

手術前

手術後
霆鋒月前做手術割除「黑色組織」後到內地出席活動,頭皮上明顯出現一撻「冇髮窿窿」。

霆鋒(左)與父親謝賢於北京返港,同車離開。